საქპატენტში საავტორო უფლებების მენეჯმენტის შესახებ სემინარი მიმდინარეობს

საქართველოში საავტორო ქონებრივი უფლებების კოლექტიურ საფუძველზე მმართველი ორგანიზაციების თაობაზე ცნობიერების ამაღლების მიზნით,  15-დან 18  მარტის ჩათვლით, საერთაშორისო პარტნიორების ჩართულობით სემინარი ტარდება. აშშ-ს კომერციული სამართლის განვითარების პროგრამის (CLDP) მიერ ორგანიზებულ სამუშაო შეხვედრას, რომელიც საქართველოში აშშ-ის საელჩოს მხარდაჭერით ხორციელდება, საქპატენტის თანამშრომლები, პატენტრწმუნებულები, კოლექტიური მართვის ორგანიზაციები და ამ თემით დაინტერესებული სხვა პირები ესწრებიან.

სემინარის მონაწილეებს გამოცდილებას უზიარებენ აშშ-ს პატენტების და სასაქონლო ნიშნების უწყების (USPTO), ინტელექტუალური საკუთრების მსოფლიო ორგანიზაციის (WIPO), რეპროდუცირების უფლებების ორგანიზაციების საერთაშორისო ფედერაციის ( IFFRO) და ავტორთა და კომპოზიტორთა საზოგადოებების საერთაშორისო კონფედერაციის (CISAC) წარმომადგენლები. აღნიშნული დაეხმარება მონაწილეებს ცოდნის გაღრმავებაში იმ პრაქტიკებისა და პოლიტიკის შესახებ, რომელიც ხელს უწყობს აშშ-ში, ევროკავშირსა და სხვა ქვეყნებში ქონებრივი უფლებების კოლექტიური მართვის წარმატებულ ფუნქციონირებას. მიღებულმა ცოდნამ უნდა გააძლიეროს ქონებრივი უფლებების კოლექტიური მართვა და მის მიმართ აღადგინოს მომხმარებელთა და უფლების მფლობელთა ნდობა. 

შეხვედრაზე განიხილავენ მუსიკალური ნაწარმოებების შესრულების, მაუწყებლობის, საჯარო გაცნობისა და საჯარო გადაცემის უფლებების მენეჯმენტს. გარდა ამისა, იგეგმება უცხოელი ექსპერტებისთვის საქართველოში  არსებული სისტემის შესახებ ინფორმაციის მიწოდება და ამის საფუძველზე სამართლებრივი და ინსტიტუციური რეფორმირებისათვის რეკომენდაციების მიღება.

კომერციული სამართლის განვითარების პროგრამა (CLDP) შეიქმნა 1992 წელს და წარმოადგენს აშშ-ს კომერციის დეპარტამენტის ტექნიკური დახმარების პლატფორმას. CLDP კომერციული სამართლის სფეროში უზრუნველყოფს გარდამავალი ქვეყნების მთავრობებისა და კერძო სექტორის სუბიექტებისათვის ტექნიკურ დახმარებას, რათა ხელი შეუწყოს მათ ეკონომიკური განვითარების მიზნების მიღწევაში. CLDP უკვე მრავალი წელია ეხმარება საქართველოს ინტელექტუალური საკუთრების უფლებების დაცვისა და აღსრულების კუთხით შესაძლებლობების გაძლიერებაში, როგორც საჯარო სექტორის უწყებებს, ასევე კერძო სექტორის სუბიექტებს.