საავტორო უფლებებით დაცული ნაწარმოებები, გამოგონებები, შექმნილი დიზაინი, ახალი ჯიში და სასაქონლო ნიშნები - მოსწავლეებმა თავიანთი ინტელექტუალური შრომის შედეგები წარმოადგინეს

ინტელექტუალური საკუთრების გაკვეთილებზე მიღებული ცოდნა მოსწავლეებმა კრეატიულად გამოხატეს ღონისძებაზე, რომელიც დასკვნითი ეტაპი იყო ევროკავშირისა და საქართველოს ინტელექტუალური საკუთრების შესახებ ერთობლივი პროექტის (EUGIPP) ფარგლებში განხორციელებული ერთ-ერთი კომპონენტის - „კრეატიულობა და ინტელექტუალური საკუთრების სწავლება საქართველოს სკოლებში", რომელიც მიმართული იყო ინტელექტუალური საკუთრების საბაზისო განათლების სისტემაში ინტეგრირების ხელშეწყობისკენ. საქართველოს მასშტაბით პროექტში ჩართული იყო 6 საჯარო სკოლა თბილისში, რუსთავსა და გორში.

„ინტელექტუალური საკუთრების დარგში განათლების დონის გაუმჯობესება და საზოგადოების ცნობიერების ამაღლება, საქართველოს ინტელექტუალური საკუთრების ეროვნული ცენტრისთვის, ერთ-ერთ უმთავრეს პრიორიტეტს  წარმოადგენს. აღნიშნული მიზნის მისაღწევად, ყველაზე ღირებულ ინვესტიციად, საბაზისო  განათლების სისტემაში ინტელექტუალური საკუთრების ინტეგრირება გვესახება“ - მინდია დავითაძე, საქპატენტის თავმჯდომარე.

ევროკავშირის მიერ დაფინანსებული პროექტი ეფუძნება ევროპის ქვეყნების კრეატიულობისა და ინტელექტუალური საკუთრების სფეროში ცოდნის გაღრმავების საუკეთესო პრაქტიკას. EUGIPP-ი 2020 წლის იანვრიდან მიმდინარეობს და მას ერთობლივად ახორციელებს ევროკავშირის ინტელექტუალური საკუთრების ორგანიზაცია (EUIPO) და საქართველოს ინტელექტუალური საკუთრების ეროვნული ცენტრი - საქპატენტი.