WIPO-ს სპეციალიზებული კურსის უსასყიდლოდ გავლას შეძლებენ DL101GE-ს წარჩინებული კურსდამთავრებულები
25 მარტი 2022 წ.
ინტელექტუალური საკუთრების ზოგადი კურსის (DL101GE) 2021 წლის საშემოდგომო სესიის წარჩინებით დასრულება ათ სტუდენტს, საქპატენტის თავმჯდომარის მოვალეობის შემსრულებელმა მანანა ფრუიძემ მიულოცა და საზეიმო ვითარებაში მათ გადასცა სერტიფიკატები და მთავარი საჩუქარი - ინტელექტუალური საკუთრების მსოფლიო ორგანიზაციის (WIPO) აკადემიის სპეციალიზებული კურსის უსასყიდლოდ გავლის შესაძლებლობა.
„WIPO-ს და საქპატენტის სახელით გადმოგცემთ ინტელექტუალური საკუთრების საბაზისო კურსის სერტიფიკატს, რომელიც შემდგომი, განვითარებული საფეხურის კურსების გავლის საფუძველია. სასაქონლო ნიშნების, გეოგრაფიული აღნიშვნების, დიზაინის ან საავტორო უფლებების კუთხით სიღრმისეულ ცოდნის დაუფლებისთვის, თქვენ როგორც წარჩინებულ კურსდამთავრებულებს, ჩვენი გადაწყვეტილებით და WIPO-ს მხარდაჭერით, გეძლევათ შესაძლებლობა აირჩიოთ თქვენთვის სასურველი მიმართულება და გაიაროთ კურსი უსასყიდლოდ“ - აღნიშნა სიტყვით მიმართვისას მანანა ფრუიძემ.
DL101GE-ს სტუდენტებს სწავლის დასრულება დისტანციურად მიულოცეს გაეროს მუდმივმა წარმომადგენელმა საქართველოში საბინე მახლიმ და WIPO-ს დისტანციური სწავლების კოორდინატორმა კაროლინ სტორანმა.
ინტელექტუალური საკუთრების ზოგადი კურსი ემსახურება ინტელექტუალური საკუთრების სფეროთი სტუდენტების, სხვადასხვა პროფესიის სპეციალისტების დაინტერესებას, მოზიდვას და ხელშეწყობას, რადგან დარგის შემდგომი განვითარებისთვის მნიშვნელოვანია ინტელექტუალური საკუთრების დარგის სპეციალისტთა რაოდენობის ზრდა. საკითხის პრიორიტეტულობიდან გამომდინარე საქპატენტი მჭიდროდ თანამშრომლობს WIPO-სთან, რომელიც გაეროს სპეციალიზებული უწყებაა და გლობალურად განსაზღვრავს ინტელექტუალური საკუთრების პოლიტიკას.
პოტენციური მსმენელების მომართვიანობის გაზრდის მიზნით საქპატენტი სხვადასხვა პლატფორმაზე პერიოდულად ავრცელებს ინფორმაციას კურსის განახლების თაობაზე, რაც, კურსების აქტუალობის გარდა, ხელს უწყობს საქპატენტის სასწავლო ცენტრის საქმიანობის პოპულარიზაციას და მის პროგრესულ, ინოვაციურ ცენტრად პოზიციონირებას. ბოლო წლებში ფიქსირდება კურსზე რეგისტრირებულ პირთა ზრდის ტენდენცია, რასაც საქპატენტის და მის ბაზაზე არსებული სასწავლო ცენტრის მიერ კურსის მსმენელების სხვადასხვა სიახლეებით წახალისებაც უწყობს ხელს.
ინტელექტუალური საკუთრების ზოგადი კურსი WIPO-ს აკადემიის დისტანციური სწავლების კურსია, რომელიც ხელმისაწვდომია ქართულ ენაზე, უსასყიდლოდ 2018 წლიდან. კურსს ხელმძღვანელობენ WIPO-ს მიერ სერტიფიცირებული სსიპ საქართველოს ინტელექტუალური საკუთრების ეროვნული ცენტრის – საქპატენტის სასწავლო ცენტრის ტუტორები. კურსის დანერგვიდან დღემდე, 8 სესიის ფარგლებში, კურსზე დარეგისტრირდა 2689 პირი, აქედან კურსი წარმატებით გაიარა 1181 პირმა. კურსის საგაზაფხულო სესიაზე რეგისტრაცია 28 მარტს იხსნება.
