ათასწლეულის ინოვაციის კონკურსზე წარდგენილი პროექტი, რომელიც პატენტუნარიანობის კრიტერიუმებს დააკმაყოფილებს, საქპატენტისგან სპეციალური პრიზით დაჯილდოვდება

საქპატენტის ორგანიზებით,  ათასწლეულის ინოვაციის კონკურსის ფინალისტებისთვის ვებინარი  „ინტელექტუალური საკუთრება – იდეიდან ინოვაციამდე“ ჩატარდა. მონაწილეებმა მიიღეს  დეტალური ინფორმაცია პატენტის მიღების პროცედურებსა და  წინასწარი საპატენტო ძიების განაცხადის შევსების წესებზე.  2022 წლის კონკურსზე საქპატენტის მხრიდან დაწესდა სპეციალური პრიზი პროექტებისთვის, რომელთა საგანი დააკმაყოფილებს პატენტუნარიანობის კრიტერიუმებს, რაც მოიცავს სიახლეს, საგამომგონებლო დონეს და სამრეწველო გამოყენებადობას. აღნიშნული კრიტერიუმების შეფასების მიზნით, ფინალში გადასულ გუნდებს შეუძლიათ, შეავსონ საქპატენტის წინასწარი ძიების ელექტრონული განაცხადი და მასზე ჩატარებული ძიების ანგარიშების მიხედვით შეირჩევა საქპატენტის რჩეული გუნდი.

ვებინარს, რომელიც 2 საათს გრძელდებოდა, ათასწლეულის ინოვაციის 2022 წლის კონკურსის ფინალისტი გუნდის წევრები და მათი  ხელმძღვანელები დაესწრნენ. საქპატენტის საქმიანობისა და ინტელექტუალური საკუთრების მნიშვნელობის შესახებ და მონაწილეებისთვის სხვა საინტერესო თემებზე, საქპატენტის გამოგონებისა და ახალი ჯიშების დეპარტამენტის უფროსმა, მერაბ კუციამ ისაუბრა. იგი ამავდროულად ინოვაციების კონკურსის ჟიურის წევრია და აფასებს კონკურსანტების მიერ წარმოდგენილ ინოვაციურ პროექტებს ტექნოლოგიების, ინჟინერიისა და საბუნებისმეტყველო მეცნიერებების დარგებში.  

კონკურსი მიმდინარეობა მესამე ეტაპზეა, ფინალისტი გუნდები ემზადებიან დასრულებული ნაშრომების (პროექტების) ჟიურის წინაშე წარსადგენად. ათასწლეულის ინოვაციის კონკურსის 2022 წლის დაჯილდოების ცერემონია ზაფხულში იგეგმება. გამარჯვებული გუნდ(ებ)ი მონაწილეობას მიიღებენ  საერთაშორისო STEM ბანაკებში აშშ-სა და/ან ევროპაში. 

ათასწლეულის ინოვაციის კონკურსს, ათასწლეულის ფონდი 2014 წლიდან ატარებს, აშშ-ის საელჩოს ფინანსური მხარდაჭერით. კონკურსი, ყოველწლიურად ცხადდება და მიზნად ისახავს უფროსკლასელებში ინოვაციური იდეებისა და პროექტების განხორციელების წახალისებას საბუნებისმეტყველო მეცნიერებებისა და ტექნოლოგიების სფეროში. საქპატენტი ყოველ წელს გამოთქვამს კონკურსის ორგანიზატორებთან თანამშრომლობის მზაობას და აქტიურადაა ჩართული ინტელექტუალური საკუთრების სფეროს შესახებ ცნობიერების ამაღლებისკენ მიმართულ აქტივობებში.