ინსტრუქცია დიზაინის რეგისტრაციის შესახებ

საჯარო სამართლის იურიდიული პირის – საქართველოს ინტელექტუალური საკუთრების ეროვნული ცენტრის – საქპატენტის თავმჯდომარის

ბრძანება №03

2011 წლის 14 დეკემბერი

„დიზაინის რეგისტრაციის თაობაზე“ ინსტრუქციის დამტკიცების შესახებ

„დიზაინს შესახებ“ საქართველოს კანონის 35-ე მუხლის შესაბამისად, ვბრძანებ:

1. დამტკიცდეს „დიზაინის რეგიტრაციის თაობაზე“ თანდართული ინსტრუქცია.

1¹. დამტკიცდეს დიზაინის რეგისტრაციის შესახებ განცხადების ფორმა (დანართი №1).

საჯარო სამართლის იურიდიული პირის – საქართველოს ინტელექტუალური საკუთრების ეროვნული ცენტრის – საქპატენტის თავმჯდომარის 2021 წლის 13 სექტემბრის ბრძანება №4 - ვებგვერდი, 14.09.2021 წ.

2. ბრძანება ამოქმედდეს გამოქვეყნებისთანავე.

თავმჯდომარე ი. ღვალაძე

ინსტრუქცია

დიზაინის რეგისტრაციის თაობაზე

თავი I

ზოგადი დებულებანი

მუხლი 1. ინსტრუქციის რეგულირების სფერო

ინსტრუქცია შემუშავებულია „დიზაინის შესახებ“ საქართველოს კანონის შესაბამისად და აწესრიგებს დიზაინის განაცხადის შედგენის, წარდგენის, ექსპერტიზის და რეგისტრაციის პროცედურებს.

მუხლი 2. ტერმინთა განმარტება

ინსტრუქციაში გამოყენებულ ტერმინებს აქვს შემდეგი მნიშვნელობა:

ა) კანონი – საქართველოს კანონი „დიზაინის შესახებ“;

ბ) ინტელექტუალური საკუთრების ეროვნული ცენტრი – ,,საქპატენტი“ (შემდგომში – საქპატენტი) – „ საქართველოს საპატენტო კანონით“ განსაზღვრული საჯარო სამართლის იურიდიული პირი;

გ) ბიულეტენი – სამრეწველო საკუთრების ობიექტებზე ოფიციალური ბეჭდური გამოცემა;

დ) რეესტრი – სამრეწველო საკუთრების რეესტრი;

დ¹) ისმო – ინტელექტუალური საკუთრების მსოფლიო ორგანიზაცია;

დ²) ჰააგის შეთანხმება – დიზაინის საერთაშორისო რეგისტრაციის შესახებ ჰააგის შეთანხმების 1960 წლის 28 ნოემბრის ჰააგის ან/და 1999 წლის 2 ივლისის ჟენევის აქტები;

ე) საერთაშორისო კოდი – ისმოს სტანდარტით ST.80 დადგენილი, მონაცემთა იდენტიფიკაციის საერთაშორისო შეთანხმებით მიღებული ორნიშნა რიცხვითი კოდი;

ვ) ქვეყნის კოდი – ისმო-ს სტანდარტით ST.3 დადგენილი ქვეყნის, მთავრობათაშორისი და სხვა ორგანიზაციების დასახელების შესატყვისი ორნიშნა კოდი;

ზ) დადგენილი საფასური – „ინტელექტუალური საკუთრების ობიექტების დაპატენტებასთან, რეგისტრაციასთან და დეპონირებასთან დაკავშირებული მომსახურების საფასურების დამტკიცების შესახებ“ საქართველოს მთავრობის 2010 წლის 3 ივლისის №182 დადგენილებით დამტკიცებული საფასური;

თ) დღე – სამუშაო დღე;

ი) საერთაშორისო ბიულეტენი – ოფიციალური გამოცემა, რომელშიც ისმოს საერთაშორისო ბიურო აქვეყნებს მონაცემებს საერთაშორისო დიზაინების რეგისტრაციის შესახებ ჰააგის შეთანხმების შესაბამისად;

კ) ისმოს ციფრული წვდომის სისტემა „DAS“ (შემდგომ – „DAS“) – ისმოს ელექტრონული სისტემა, რომელიც მის მონაწილე ინტელექტუალური საკუთრების უწყებებს საშუალებას აძლევს, ელექტრონული სისტემის მეშვეობით, უსაფრთხოდ გაცვალონ პარიზის კონვენციით გათვალისწინებული განაცხადის პრიორიტეტთან დაკავშირებული დოკუმენტაცია;

ლ) დიზაინების საერთაშორისო კლასიფიკაცია (შემდგომში – ლოკარნოს კლასიფიკაცია) – 1968 წლის 8 ოქტომბერს ხელმოწერილი დიზაინების საერთაშორისო კლასიფიკაციის ლოკარნოს შეთანხმებით მიღებული საერთაშორისო კლასიფიკაცია.

თავი II

განაცხადის ფორმა და წარდგენის წესი

მუხლი 3. განაცხადის წარდგენა

1. განაცხადი დიზაინის რეგისტრაციის თაობაზე (შემდგომში – განაცხადი) წარედგინება საქპატენტს კანონის მე-11 მუხლით და ამ ინსტრუქციით დადგენილი წესით.

2. განაცხადის წარდგენა საქპატენტში ხდება მატერიალური ფორმით ან ელექტრონული სისტემის – https://online.sakpatenti.gov.ge/ (შემდგომში – ელექტრონული სისტემა) მეშვეობით.

2¹. საგანაცხადო მასალების მატერიალური ფორმით წარდგენის შემთხვევაში, განცხადება შეტანილ უნდა იქნეს საქპატენტის თავმჯდომარის მიერ დამტკიცებული განცხადების ფორმით, ამ ინსტრუქციის მე-5 მუხლით დადგენილი წესით, ხოლო ელექტრონული სისტემით წარდგენისას, საგანაცხადო მასალის შეტანა ხდება საქპატენტის ინტელექტუალური საკუთრების ობიექტებზე საქმისწარმოების ელექტრონული სისტემის მეშვეობით.

2². საქპატენტში საგანაცხადო მასალების მატერიალური ფორმით წარდგენის შემთხვევაში, განაცხადზე საქმისწარმოების ფარგლებში, განმცხადებელს ყველა სახის დოკუმენტი ეგზავნება მატერიალური ფორმით.

2³. საქპატენტში საგანაცხადო მასალების ელექტრონული სისტემით წარდგენის შემთხვევაში, განაცხადზე საქმისწარმოების ფარგლებში, განმცხადებელს ყველა სახის დოკუმენტი ეგზავნება საქპატენტის ელექტრონული სისტემის მეშვეობით და მისთვის ჩაბარებულად ითვლება ელექტრონულ სისტემაში ასახვისთანავე. ამ მომენტიდან იწყება კანონმდებლობით დადგენილი ვადების ათვლა ყველა შესაბამისი მომდევნო ქმედებისთვის.

2⁴. საქპატენტში განაცხადის ელექტრონულად წარდგენის შემდგომ, განმცხადებლის მიერ საქმისწარმოების მატერიალური ფორმით გაგრძელების მოთხოვნის შემთხვევაში, მოთხოვნის დღიდან განაცხადზე აღარ გავრცელდება ელექტრონულ საქმისწარმოებასთან დაკავშირებით საფასურებზე კანონმდებლობით დადგენილი შეღავათი, ასეთის არსებობის შემთხვევაში.

2⁵. საქპატენტში განაცხადის მატერიალური ფორმით წარდგენის შემდგომ განმცხადებელი უფლებამოსილია, მოითხოვოს საქმისწარმოების ელექტრონული ფორმით გაგრძელება. ამ შემთხვევაში განაცხადზე არ გავრცელდება კანონმდებლობით გათვალისწინებულ ელექტრონულ საქმისწარმოებასთან დაკავშირებით დადგენილი შეღავათი, ასეთის არსებობის შემთხვევაში.

2⁶. დამატებითი ინფორმირების მიზნით, განმცხადებელს შესაძლებელია გაეგზავნოს მოკლე ტექსტური შეტყობინება განაცხადთან დაკავშირებული ქმედებების შესახებ.

3. ამ მუხლის 2² და 2³ პუნქტებით გათვალისწინებული საქმისწარმოების წესები ვრცელდება ასევე დიზაინის რეგისტრაციის შემდგომ განხორციელებულ ქმედებებთან დაკავშირებულ საქმისწარმოებაზეც.

მუხლი 4. განაცხადის ფორმა და თანდართული მასალები

1. განაცხადი უნდა შეიცავდეს:

ა) განცხადებას დიზაინის რეგისტრაციის თაობაზე (შემდგომში – განცხადება);

ბ) დიზაინის გამოსახულებას;

2. განაცხადი დამატებით შეიძლება შეიცავდეს:

ა) დიზაინის აღწერილობას, რომელიც ატარებს მხოლოდ განმარტებით ხასიათს. იგი შეიძლება სიტყვიერად აღწერდეს დიზაინის გამოსახულებას და გამოსახულების ნიშნების თავისებურებებს;

ბ) პრიორიტეტის დამადასტურებელ საბუთს, თუ მოითხოვება საკონვენციო ან საგამოფენო პრიორიტეტი.

3. იმ შემთხვევაში, თუ განმცხადებელი დიზაინერის უფლებამონაცვლეა, განაცხადს წარდგენისთანავე ან წარდგენის დღიდან ორი თვის ვადაში უნდა დაერთოს უფლებამონაცვლეობის დამადასტურებელი საბუთი.

4. თუ განაცხადი წარადგინა განმცხადებლის წარმომადგენელმა, განაცხადს წარდგენისთანავე ან წარდგენის დღიდან 2 თვის ვადაში უნდა დაერთოს წარმომადგენლობის უფლებამოსილების დამადასტურებელი საბუთი.

5. იმ შემთხვევაში, თუ განმცხადებელი ერთ-ერთი თანადიზაინერია, განაცხადს უნდა დაერთოს თანადიზაინერთა სათანადოდ დამოწმებული წერილობითი თანხმობა, თუ მათ შორის დადებული ხელშეკრულებით სხვა რამ არ არის გათვალისწინებული. ამ შემთხვევაში განაცხადს უნდა დაერთოს ხელშეკრულების დამოწმებული ასლი.

6. უცხოურ ენაზე წარდგენილ საგანაცხადო მასალებს, წარდგენის დღიდან ორი თვის ვადაში უნდა დაერთოს სათანადო წესით დამოწმებული თარგმანი ქართულ ენაზე, წინააღმდეგ შემთხვევაში აღნიშნული მასალები წარდგენილად არ მიიჩნევა.

7. იმ შემთხვევაში, თუ განმცხადებელი სარგებლობს მთავრობის დადგენილებით დამტკიცებული შეღავათიანი საფასურით, აღნიშნულის დამადასტურებელი საბუთი საქპატენტს წარედგინება განაცხადის შეტანის დღიდან 2 კვირის ვადაში.

მუხლი 4¹. წარმომადგენლის დანიშვნა

1. საქპატენტში განაცხადის წარდგენისას ან წარდგენის შემდეგ განმცხადებელს უფლება აქვს დანიშნოს წარმომადგენელი წერილობითი მინდობილობის საფუძველზე.

2. წარმომადგენლის დანიშვნის შემთხვევაში საქპატენტი განმცხადებლისთვის განკუთვნილ ყველა დოკუმენტს უგზავნის წარმომადგენელს.

3. წარმომადგენელზე გაცემული მინდობილობა უნდა შეიცავდეს:

ა) მარწმუნებლის სახელსა და გვარს (სახელწოდებას), იურიდიულ მისამართს, ასევე, ფიზიკური პირის შემთხვევაში – მარწმუნებლისა და რწმუნებულის პირად ნომერს, ხოლო იურიდიული პირის შემთხვევაში – საიდენტიფიკაციო ნომერს;

ბ) წარმომადგენლის უფლებამოსილების ფარგლებს;

გ) მინდობილობის შედგენის თარიღსა და ადგილს;

დ) მარწმუნებლის ხელმოწერას;

ე) მინდობილობის მოქმედების ვადას. თუ ვადა აღნიშნული არ არის, მინდობილობა ძალაშია მარწმუნებლის მიერ უფლებამოსილების შეწყვეტამდე.

4. მინდობილობა ფორმდება იმ ქვეყნის კანონმდებლობის შესაბამისად, სადაც ის არის შედგენილი.

5. უცხოელი განმცხადებელი, რომელსაც არ გააჩნია მუდმივი საცხოვრებელი ადგილი საქართველოში ან რეგისტრირებულია მისამართის მითითების გარეშე, ვალდებულია საქპატენტის მოთხოვნიდან 3 დღის ვადაში დანიშნოს წარმომადგენლად საქართველოში განსაზღვრულ მისამართზე რეგისტრირებული ქმედუნარიანი პირი, რომელსაც გაეგზავნება მისთვის განკუთვნილი ყველა საბუთი. უცხოელი განმცხადებელი წარმომადგენელზე მინდობილობას გასცემს უშუალოდ თვითონ ან სათანადო უფლებამოსილების მქონე რწმუნებულის მეშვეობით. თუ განმცხადებელი არ შეასრულებს ამ პუნქტით გათვალისწინებულ მოთხოვნას, საქპატენტი გამოიტანს გადაწყვეტილებას განაცხადზე საქმისწარმოების შეწყვეტის შესახებ. ამასთან, საქპატენტი იხსნის ვალდებულებას საქმისწარმოების შეწყვეტის შესახებ გადაწყვეტილების მხარისათვის გაგზავნის თაობაზე.

მუხლი 5. განცხადების შევსების წესი

1. (ამოღებულია - 13.09.2021 №4).

2. განცხადება ივსება ქართულ ენაზე, ნაბეჭდი სახით.

3. განცხადება უნდა შეიცავდეს:

ა) განმცხადებლ(ებ)ის სახელს და გვარს (საერთაშორისო კოდი – 71) და პირად ნომერს, იურიდიული პირის შემთხვევაში, იურიდიული პირის სახელწოდებას და საიდენტიფიკაციო ნომერს;

ბ) განმცხადებლის მისამართს ან მუდმივ საცხოვრებელ ადგილს, მოქალაქეობის ქვეყნის კოდის მითითებით; იურიდიული პირის შემთხვევაში, იურიდიული პირის მისამართს ქვეყნის კოდის მითითებით;

გ) თხოვნას დიზაინის რეგისტრაციის შესახებ;

დ) თხოვნას პრიორიტეტის დადგენის შესახებ, რისთვისაც განმცხადებელმა ,,X”-ით უნდა მონიშნოს მოთხოვნილი პრიორიტეტის შესაბამისი უჯრა;

ე) საკონვენციო პრიორიტეტის შემთხვევაში პირველი განაცხადის ნომერს (საერთაშორისო კოდი – 31), პირველი განაცხადის შეტანის თარიღს (საერთაშორისო კოდი – 32) პირველი განაცხადის მიმღები ქვეყნის/უწყების კოდს (საერთაშორისო კოდი - 33);

ვ) საგამოფენო პრიორიტეტის მოთხოვნის შემთხვევაში დიზაინის გამოფენაზე ჩვენების თარიღს (საერთაშორისო კოდი – 23);

ზ) პროდუქტის დასახელებას, რომელშიც ჩართულია ან რომლისთვისაც უნდა იყოს გამოყენებული დიზაინი (საერთაშორისო კოდი – 54);

თ) განაცხადში წარდგენილი დიზაინების რაოდენობას (საერთაშორისო კოდი – 28);

ი) მიმოწერის მისამართს საქართველოს ტერიტორიაზე, ადრესატის სრულ სახელს ან დასახელებას, ტელეფონს, ელექტრონული ფოსტის მისამართსა და ფაქსის ნომერს (საერთაშორისო კოდი – 98);

კ) წარმომადგენლის სახელს/სახელწოდებას, მისამართს, ტელეფონს, ელექტრონული ფოსტის მისამართს (საერთაშორისო კოდი – 74), თუ განაცხადი წარდგენილია დიზაინერის წარმომადგენლის ან უფლებამონაცვლის მეშვეობით;

ლ) დიზაინერ(ებ)ის სახელს და მისამართს ქვეყნის კოდის მითითებით შესაბამის გრაფაში;

მ) მითითებას იმის შესახებ, უკავშირდება თუ არა დიზაინის შექმნა სამსახურებრივი მოვალეობის ან შეკვეთის შესრულებას;

ნ) შესაბამის მითითებას, თუ განმცხადებელი იმავდროულად დამსაქმებელია;

ო) განაცხადის თანდართული საბუთების ნუსხას, სადაც მიეთითება ეგზემპლარებისა და ფურცლების რაოდენობა.

4. თუ განცხადების შევსებისას ამ მუხლის მე-3 პუნქტის „მ“ ან „ნ“ ქვეპუნქტის შესაბამისად მითითებულია, რომ განმცხადებელი იმავდროულად შემკვეთი ან დამსაქმებელია, განმცხადებელს არ ეკისრება განმცხადებელსა და დასაქმებულს ან შეკვეთის მიმღებს შორის დადებული ხელშეკრულების წარმოდგენის ვალდებულება.

5. თუ განმცხადებელი ითხოვს გამოქვეყნების გადადებას, ამ შემთხვევაში მან განცხადების შესაბამის გრაფაში ,,X”-ით (იქსით) უნდა მონიშნოს უჯრა და მიუთითოს გამოქვეყნების გადადების ვადა თვეებში, არა უმეტეს 30 თვისა განაცხადის წარდგენიდან ან პრიორიტეტის თარიღიდან. მრავლობითი განაცხადის შემთხვევაში, განმცხადებელი ვალდებულია განაცხადში მიუთითოს ის დიზაინები, რომლებზეც მოითხოვება ვადის გადადება.

6. თუ განმცხადებელი ითხოვს დაჩქარებულ რეგისტრაციას, მან ,,X”-ით უნდა მონიშნოს შესაბამისი უჯრა.

7. განცხადება უნდა იყოს ხელმოწერილი და ხელმოწერის დღით დათარიღებული განმცხადებლის ან წარმომადგენლის მიერ და მიეთითოს ხელმომწერი პირის სრული სახელი.

მუხლი 6. პროდუქტის დასახელება და კლასიფიკაცია

1. პროდუქტის დასახელება უნდა იყოს ფორმულირებული ისეთი სახით, რომ შეესაბამებოდეს მის არსს და დანიშნულებას და შესაძლებელი იყოს პროდუქტის კლასიფიცირება ლოკარნოს კლასიფიკაციის მხოლოდ ერთ კლასში. ამასთან, უნდა შეესაბამებოდეს ამ კლასის ჩამონათვალის შესაბამის დასახელებას.

2. დაუშვებელია დასახელება შეიცავდეს მითითებას პროდუქტის ხარისხზე.

3. დაუშვებელია დასახელებაში დამატებით ფიგურირებდეს სპეციალური დასახელება, ცალკეული ასოები და ციფრები.

4. ინფორმაცია დასახელებისა და საკლასიფიკაციო ინდექსის შესახებ გავლენას არ ახდენს დაცვის ფარგლებზე.

მუხლი 7. დიზაინის გამოსახულება

1. დიზაინის გამოსახულება უნდა შესრულდეს გრაფიკული ან ფოტოგრაფიული გამოსახულების სახით და აკმაყოფილებდეს შემდეგ მოთხოვნებს:

ა) თითოეული ფურცელი უნდა იყოს თეთრი, გაუმჭვირვალე, სტანდარტის შესაბამისი A4 ზომის (29,7 სმ X 21 სმ), ხოლო სივრცე, რომელიც გამოიყენება გამოსახულებისათვის, არ უნდა აღემატებოდეს 26,2 სმ X 17 სმ-ს. მარცხენა მხრიდან უნდა იყოს დატოვებული სულ მცირე 2,5 სმ-ის ტოლი ველი;

ბ) გამოსახულება უნდა იყოს ვარგისი გამოქვეყნებისათვის, მკაფიოდ გამოსახული და ისეთი ხარისხის, რომ ჩანდეს ობიექტის ყველა დეტალი, რომელზეც მოითხოვება დაცვა;

გ) გამოსახულება უნდა იყოს შესრულებული ნეიტრალურ ფონზე და შეიძლება იყოს შავ-თეთრი ან ფერადი;

დ) გამოსახულებები შესრულებული უნდა იყოს ერთი და იგივე მასშტაბში. დასაშვებია რომელიმე ნაწილის გადიდებული სახით ჩვენება; G

ე) თითოეული რაკურსის გამოსახულების ზომა არ უნდა აღემატებოდეს 16x16 სმ-ს და არ იყოს 3x3 სმ-ზე ნაკლები;

ვ) გამოსახულება არ უნდა შეიცავდეს განმარტებითი სახის წარწერას ან სხვა ისეთ ელემენტს, რომელიც დასაცავი დიზაინის ნაწილს არ წარმოადგენს;

ზ) გამოსახულება არ უნდა იყოს წარდგენილი ტექნიკური ნახაზების სახით.

2. თუ განაცხადი შეიცავს რამდენიმე დიზაინს, განმცხადებელმა თანმიმდევრობით უნდა დანომროს თითოეული მათგანი არაბული ციფრებით.

3. თუ დიზაინის ხედების/რაკურსების რაოდენობა ერთზე მეტია, დიზაინის შესაბამის ნომერს უნდა მიეწეროს წერტილით გაყოფილი შესაბამისი ციფრი, სადაც წერტილის მარცხნივ დაწერილი ციფრი აღნიშნავს დიზაინის ნომერს, ხოლო მარჯვენა მხარეს დაწერილი ხედის ნომერს.

4. დიზაინის ის ნაწილი, რომელზეც არ მოითხოვება დაცვა, გამოსახულებაზე მითითებულ უნდა იქნეს წყვეტილი ხაზით, ან ნაჩვენები უნდა იყოს გაბუნდოვნების, ფერით დაჩრდილვის, ან იმ ნაწილის შემოსაზღვრის გზით, რომელზეც მოითხოვება დაცვა.

5. პროდუქტის შიდა ნაწილი, რომელიც გარედან არ ჩანს, ნაჩვენები უნდა იყოს წყვეტილ ხაზებს შორის ორი წერტილით.

6. თუ განაცხადი ეხება დიზაინს, რომელიც წარმოადგენს ზედაპირზე განმეორებად ნახატს, გამოსახულება უნდა ასახავდეს მთლიანად ნახატს და იმ ზედაპირს, რომელზეც უნდა იყოს განმეორებული ნახატი.

7. თუ განაცხადი ეხება დიზაინს, რომელიც წარმოადგენს ტიპოგრაფიულ შრიფტს, მისი გამოსახულება უნდა მოიცავდეს ანბანის ყველა ასოს და ყველა არაბულ ციფრს ხუთსტროფიან ტექსტთან ერთად, რომელშიც გამოყენებულია ეს შრიფტი როგორც ასოების, ისე ციფრების სახით. შრიფტის ზომა უნდა იყოს 16.

8. თუ დიზაინი ეხება შედგენილ პროდუქტს, გამოსახულების ერთ-ერთი ხედი უნდა გამოსახავდეს მას აწყობილ მდგომარეობაში.

9. თუ დიზაინი წარმოადგენს პროდუქტების ნაკრებს, რომლებიც ერთმანეთთან დაკავშირებულია ესთეტიკური და ფუნქციური ურთიერთშეთავსებადობით, იგი წარდგენილ უნდა იქნეს ერთი გამოსახულების სახით, ამასთან, მასში შემავალი თითოეული პროდუქტი ნაჩვენები უნდა იყოს ცალ-ცალკე. ნაკრების სახით, ერთ დიზაინად წარმოდგენილი ყველა პროდუქტი ექვემდებარება საერთო დაცვას.

10. განაცხადის მატერიალური ფორმით წარდგენის შემთხვევაში, გამოსახულება წარდგენილ უნდა იქნეს ქაღალდზე ერთ ეგზემპლარად, ამასთან, დასაშვებია გამოსახულების მეორე ეგზემპლარის ელექტრონული ფორმით „JPEG (.jpg, .jpeg)” ფორმატით წარდგენა. განაცხადის ელექტრონულად წარდგენის შემთხვევაში ელექტრონულად ატვირთული გამოსახულების მაქსიმალური ზომა უნდა იყოს 5MB, ხოლო გარჩევადობა 100-300 dpi-ს ფარგლებში.

მუხლი 8. პროდუქტის ნიმუში

1. პროდუქტის ნიმუშის წარდგენა დასაშვებია, თუ სარეგისტრაციოდ წარდგენილია ორგანზომილებიანი დიზაინი და განმცხადებელი მოითხოვს გამოქვეყნების გადადებას.

2. პროდუქტის ნიმუში წარდგენილი უნდა იყოს 2 ეგზემპლარად და მისი ზომები არ უნდა აღემატებოდეს 26,2 სმ X 17 სმ-ს.

3. თუ დიზაინი წარმოადგენს განმეორებად ნახატს, ნიმუში უნდა ასახავდეს მთელ ნახატს და განმეორებადი ზედაპირის აღსაქმელად საკმარის ნაწილს სიგრძესა და სიგანეში.

4. ნიმუში არ უნდა იყოს მალფუჭებადი ან შესანახად სახიფათო.

მუხლი 9. მრავლობითი განაცხადი

1. მრავლობითი განაცხადი შეიძლება შეიცავდეს დიზაინების საერთაშორისო კლასიფიკაციის ერთ კლასს მიკუთვნებულ არა უმეტეს ას დიზაინს.

2. განმცხადებელმა მრავლობით განაცხადში მოცემული დიზაინების გამოსახულებებს უნდა მიანიჭოს თანმიმდევრული ნუმერაცია ამ ინსტრუქციის მე-7 მუხლის მე-2 და მე-3 პუნქტების შესაბამისად.

3. თუ დადგინდა, რომ მრავლობით განაცხადში გაერთიანებული დიზაინები არ მიეკუთვნება საერთაშორისო კლასიფიკაციის ერთ კლასს, განმცხადებელს ეგზავნება შეტყობინება ხარვეზის დადგენის შესახებ. განმცხადებელი ვალდებულია შეტყობინების ჩაბარებიდან ერთი თვის ვადაში დაყოს განაცხადი და საქპატენტს წარუდგინოს გამოცალკევებული განაცხადი.

4. თუ განმცხადებელი არ შეასრულებს ამ მუხლის მე-3 პუნქტით განსაზღვრულ მოთხოვნას, საქპატენტი:

ა) განიხილავს მხოლოდ იმ დიზაინებს, რომლებიც მიეკუთვნება განცხადებაში მითითებულ საერთაშორისო კლასიფიკაციის ერთ კლასს;

ბ) განსაზღვრავს ერთ-ერთი დიზაინის კლასს, თუ განმცხადებელს განცხადებაში მითითებული არა აქვს საერთაშორისო კლასიფიკაციის კლასი და განიხილავს მხოლოდ იმ დიზაინებს, რომლებიც მიეკუთვნება არჩეული დიზაინის კლასს, ხოლო დიზაინებს, რომლებიც არ მიეკუთვნება საქპატენტის მიერ დადგენილ კლასს – დატოვებს განუხილველად.

5. მრავლობითი განაცხადისათვის საფასურების გადახდა ხდება მრავლობით განაცხადში წარდგენილი თითოეული დიზაინისათვის.

მუხლი 10. გაერთიანებული განაცხადი

1. გაერთიანებული განაცხადის წარდგენა დასაშვებია, თუ მასში შემავალი დიზაინები მიეკუთვნება დიზაინების საერთაშორისო კლასიფიკაციის ერთ კლასს.

2. გაერთიანებული განაცხადი საქპატენტს უნდა წარედგინოს დიზაინის რეგისტრაციის თაობაზე გადაწყვეტილების გამოტანამდე.

3. გაერთიანებული განაცხადის ფარგლები არ უნდა სცილდებოდეს მასში შემავალი განაცხადების ფარგლებს.

4. გაერთიანებულ განაცხადში შემავალ ყველა დიზაინს უნარჩუნდება შესაბამისი პრიორიტეტი.

5. გაერთიანებული განაცხადი განიხილება როგორც ახალი განაცხადი, ხოლო მასში გაერთიანებულ თითოეულ განაცხადზე გაერთიანებამდე მიმდინარე საქმისწარმოება წყდება.

მუხლი 11. გამოცალკევებული განაცხადი

1. გამოცალკევებული განაცხადის წარდგენა დასაშვებია დიზაინის რეგისტრაციის თაობაზე გადაწყვეტილების გამოტანამდე.

2. გამოცალკევებული განაცხადის ფარგლები არ უნდა სცილდებოდეს იმ განაცხადის ფარგლებს, რომლისგანაც მოხდა გამოცალკევება.

3. განაცხადზე, რომლისგანაც მოხდა განაცხად(ებ)ის გამოცალკევება, საქმისწარმოება გრძელდება, ხოლო გამოცალკევებულ განაცხადში შემავალ დიზაინს უნარჩუნდება იმ განაცხადის პრიორიტეტი, რომლისგანაც მოხდა გამოცალკევება.

მუხლი 12. საგანაცხადო მასალების მიღების პროცედურა

1. საქპატენტში წარდგენისთანავე საგანაცხადო მასალებს ენიჭება საქმის ნომერი და წარდგენის თარიღი.

2. განაცხადის წარდგენისთანავე გაიცემა ცნობა დიზაინის საგანაცხადო მასალების მიღების შესახებ, რომელშიც აღნიშნულ იქნება ამ მუხლის პირველი პუნქტით გათვალისწინებული მონაცემები, ასევე, წარდგენილი დიზაინების რაოდენობა და გამოსახულება. აღნიშნული ცნობა არ წარმოადგენს შეტანის თარიღის დამადასტურებელ საბუთს.

მუხლი 13. პრიორიტეტის მოთხოვნა

1. განმცხადებელი უფლებამოსილია მოითხოვოს საკონვენციო ან საგამოფენო პრიორიტეტი საქპატენტში განაცხადის შეტანისთანავე ან შეტანიდან ერთი თვის ვადაში, მაგრამ არაუგვიანეს ფორმალური მოთხოვნების ექსპერტიზის დასრულებამდე, ამასთან, უნდა გადაიხადოს საკონვენციო ან საგამოფენო პრიორიტეტის მოთხოვნისთვის დადგენილი საფასური. განაცხადის წარდგენისას დაცული უნდა იყოს კანონის მე-13 მუხლით განსაზღვრული ვადა.

2. საკონვენციო პრიორიტეტის მოთხოვნიდან 3 თვის ვადაში განმცხადებელი ვალდებულია წარადგინოს პირველი განაცხადის მიმღები უწყების მიერ დამოწმებული პირველი განაცხადის ასლი, რომელსაც თან უნდა ერთოდეს სათანადოდ დამოწმებული ქართული თარგმანი.

2¹. საქპატენტში პირველი განაცხადის დამოწმებული ასლის მიღება შესაძლებელია, ასევე, „DAS“-ის მეშვეობით. აღნიშნულ შემთხვევაში განმცხადებელი ვალდებულია საქპატენტში წარადგინოს „DAS“-ის შესაბამისი კოდი და „DAS“-ში განთავსებული დოკუმენტის სათანადოდ დამოწმებული ქართული თარგმანი.

3. საგამოფენო პრიორიტეტის მოთხოვნიდან სამი თვის ვადაში განმცხადებელი ვალდებულია წარადგინოს გამოფენისათვის პასუხისმგებელი პირის მიერ გაცემული გამოფენაში მონაწილეობის დამადასტურებელი საბუთი, რომელსაც თან უნდა ერთოდეს სათანადოდ დამოწმებული ქართული თარგმანი.

4. საბუთში აღნიშნული უნდა იყოს გამოფენის გახსნის თარიღი და იგი უნდა ადასტურებდეს იმ პროდუქტის ექსპონირების ფაქტს, რომელშიც ჩართულია, ან რომლისთვისაც გამოიყენება დიზაინი.

5. საკონვენციო ან საგამოფენო პრიორიტეტის მოთხოვნის შემთხვევაში, თუ განმცხადებელი არ წარადგენს ამ მუხლის მე-2 და მე-3 პუნქტებით გათვალისწინებულ საბუთებს, განაცხადს პრიორიტეტი დაუდგინდება განაცხადის საქპატენტში შეტანის თარიღით.

6. დაუშვებელია განაცხადს უარი ეთქვას საკონვენციო პრიორიტეტის დადგენის თაობაზე იმ მოტივით, რომ პირველი განაცხადის შეტანის ქვეყანაში ან სხვა ქვეყანაში დიზაინს უარი ეთქვა რეგისტრაციაზე ან დიზაინის რეგისტრაცია გაუქმებულია.

7. თუ განმცხადებელი არ ითხოვს საკონვენციო ან საგამოფენო პრიორიტეტს, განაცხადს პრიორიტეტი უდგინდება განაცხადის საქპატენტში შეტანის თარიღით.

8. მრავლობითი განაცხადის შემთხვევაში დასაშვებია შესაბამისი საკონვენციო და საგამოფენო პრიორიტეტის მოთხოვნა განაცხადში შემავალი ცალკეული დიზაინისათვის.

თავი III

განაცხადის ექსპერტიზის ჩატარების წესი

მუხლი 14. განაცხადის ექსპეტიზა

1. საქპატენტში წარდგენილ განაცხადზე ტარდება ექსპერტიზა კანონის მე-14-17 მუხლების შესაბამისად.

2 . განმცხადებლისათვის გაგზავნილი შეტყობინებები პასუხის მიღებამდე აჩერებს ექსპერტიზის ვადებს.

3. ამ მუხლის მიზნებისთვის განაცხადთან დაკავშირებული ქმედებებისათვის დადგენილი ვადები (გარდა შეტანის თარიღის დადგენისა) აითვლება შესაბამისი საფასურის გადახდის დღიდან.

მუხლი 15. შეტანის თარიღის დადასტურება

1. განაცხადს უდასტურდება შეტანის თარიღი შეტანიდან ორი კვირის განმავლობაში, თუ განცხადება შევსებულია ქართულ ენაზე და შეიცავს განმცხადებლის სახელს და მიმოწერის მისამართს, ამასთან, განაცხადი უნდა შეიცავდეს დიზაინის გამოსახულებას.

2. იმ შემთხვევაში, თუ დაცულია ამ მუხლის პირველი პუნქტის მოთხოვნები, გამოსახულების ნაცვლად შეიძლება წარდგენილ იყოს პროდუქტის ნიმუში, თუ დიზაინი ორგანზომილებიანია და განმცხადებელი ითხოვს გამოქვეყნების გადადებას.

3. გამოსახულება არ ჩაითვლება წარდგენილად, თუ იგი არ არის მკაფიოდ გამოსახული, რის გამოც შეუძლებელია დიზაინის აღქმა.

4. თუ განმცხადებელი შეასრულებს ამ მუხლის პირველი, მე-2, მე-3 პუნქტებით გათვალისწინებულ მოთხოვნებს, საქპატენტი განაცხადს შეტანის თარიღს დაუდასტურებს ზემოაღნიშნული საგანაცხადო მასალების წარდგენის თარიღით.

5. თუ განაცხადი არ აკმაყოფილებს ამ მუხლის პირველი, მე-2, მე-3 პუნქტებით გათვალისწინებულ მოთხოვნებს, განმცხადებელს ეგზავნება შეტყობინება, რომლის ჩაბარებიდან ერთი თვის ვადაში იგი ვალდებულია წარადგინოს მოთხოვნილი მასალა. ამ მოთხოვნის შესრულების შემთხვევაში განაცხადის შეტანის თარიღად მიიჩნევა აღნიშნული მოთხოვნის შესრულების თარიღი. წინააღმდეგ შემთხვევაში განაცხადი შეტანილად არ მიიჩნევა და მიიღება გადაწყვეტილება საგანაცხადო მასალების განუხილველად დატოვების შესახებ.

მუხლი 16. ფორმალური მოთხოვნების ექსპერტიზა

1. საქპატენტი განაცხადის ფორმალური მოთხოვნების ექსპერტიზას ატარებს განაცხადის შეტანის თარიღის დადასტურებიდან ერთი თვის ვადაში, მაგრამ არაუადრეს ერთი თვისა განაცხადის წარდგენის თარიღიდან, თუ გადახდილია ფორმალური მოთხოვნების ექსპერტიზისათვის დადგენილი საფასური.

2. ფორმალური მოთხოვნების ექსპერტიზის საფასური გადაიხდება განაცხადის წარდგენიდან ორი კვირის ვადაში.

3. ამ მუხლის მე-2 პუნქტით გათვალისწინებულ ვადაში განმცხადებლის მიერ საფასურის გადაუხდელობის შემთხვევაში განაცხადზე საქმისწარმოება წყდება.

4. თუ განაცხადი შეიცავს რამდენიმე დიზაინს და ფორმალური ექსპერტიზისათვის გადახდილი საფასური ნაკლებია განაცხადში შემავალი დიზაინებისათვის დადგენილი საფასურის ოდენობაზე, განმცხადებელს ეგზავნება შეტყობინება ხარვეზის დადგენის შესახებ, რომლის მიღებიდან ერთი თვის ვადაში განმცხადებელი ვალდებულია გადაიხადოს საფასური სრულად, ან მიუთითოს, რომელი დიზაინები უნდა იყოს განხილული გადახდილი საფასურის ფარგლებში.

5. თუ განმცხადებელი არ შეასრულებს ამ მუხლის მე-4 პუნქტით გათვალისწინებულ მოთხოვნას, საქპატენტი ფორმალური მოთხოვნების ექსპერტიზას ჩაატარებს საქპატენტის მიერ მითითებული რიგითობის მიხედვით იმდენ დიზაინზე, რამდენისთვისაც საკმარისია გადახდილი საფასური.

6. ფორმალური მოთხოვნების ექსპერტიზის დროს მოწმდება საგანაცხადო მასალების გაფორმების შესაბამისობა კანონის მე-16 მუხლისა და ამ ინსტრუქციის შესაბამისი მუხლების მოთხოვნებთან.

7. თუ საგანაცხადო მასალები არ აკმაყოფილებს ამ მუხლის მე-6 პუნქტით დადგენილ მოთხოვნებს, განმცხადებელს ეგზავნება შეტყობინება ხარვეზის დადგენის შესახებ, რომლის ჩაბარებიდან ერთი თვის ვადაში იგი ვალდებულია შეავსოს დადგენილი ხარვეზი, წინააღმდეგ შემთხვევაში განაცხადზე საქმისწარმოება წყდება და გადაწყვეტილება საქმისწარმოების შეწყვეტის შესახებ ეგზავნება განმცხადებელს.

8. მრავლობითი განაცხადის შემთხვევაში, თუ ხარვეზი დაუდგინდა განაცხადში შემავალ რომელიმე დიზაინს (დიზაინებს) და თუ დადგენილ ვადაში არ იქნება ხარვეზი შევსებული, ამ დიზაინის მიმართ შეწყდება საქმისწარმოება.

9. თუ განაცხადი წარდგენილია კანონისა და ამ ინსტრუქციის შესაბამისად, განაცხადს ენიჭება ნომერი, უდასტურდება პრიორიტეტი და მიიღება გადაწყვეტილება ფორმალური მოთხოვნების ექსპერტიზის დასრულების შესახებ.

10. ფორმალური მოთხოვნების ექსპერტიზის გადაწყვეტილება ეგზავნება განმცხადებელს.

მუხლი 17. არსობრივი ექსპერტიზა

1. ფორმალური მოთხოვნების ექსპერტიზის დასრულებიდან სამი თვის ვადაში, საქპატენტი ატარებს არსობრივ ექსპერტიზას კანონის მე-17 მუხლის შესაბამისად, არსობრივი ექსპერტიზისათვის დადგენილი საფასურის გადახდის შემდეგ.

2. არსობრივი ექსპერტიზის საფასური განმცხადებელმა უნდა გადაიხადოს ფორმალური მოთხოვნების ექსპერტიზის დასრულების შესახებ გადაწყვეტილების ჩაბარებიდან ორი კვირის ვადაში, წინააღმდეგ შემთხვევაში განაცხადზე შეწყდება საქმისწარმოება.

3. თუ განაცხადი შეიცავს რამდენიმე დიზაინს და არსობრივი ექსპერტიზისათვის გადახდილი საფასური ნაკლებია განაცხადში შემავალი დიზაინებისათვის დადგენილი საფასურის ოდენობაზე, განმცხადებელს ეგზავნება შეტყობინება ხარვეზის დადგენის შესახებ, რომლის მიღებიდან ერთი თვის ვადაში განმცხადებელი ვალდებულია გადაიხადოს არსობრივი ექსპერტიზის საფასური სრულად, ან მიუთითოს, რომელი დიზაინები უნდა იყოს განხილული არსობრივი ექსპერტიზის დროს.

4. თუ განმცხადებელი არ შეასრულებს ამ მუხლის მე-3 პუნქტით გათვალისწინებულ პირობას, საქპატენტი არსობრივი მოთხოვნების ექსპერტიზას ჩაატარებს რიგითობის მიხედვით იმდენ დიზაინზე, რამდენისთვისაც საკმარისია გადახდილი საფასური.

5. არსობრივი ექსპერტიზის დროს განაცხადის განხილვა შეიძლება შეჩერდეს საქპატენტის მიერ, თუ არსებობს დასაბუთებული ვარაუდი, რომ განაცხადით წარდგენილი დიზაინი იდენტურია უფრო ადრინდელი პრიორიტეტის მქონე განაცხადით წარდგენილი დიზაინისა.

6. ამ მუხლის მე-5 პუნქტით გათვალისწინებულ შემთხვევაში, განაცხადის განხილვა ჩერდება, ვიდრე ბიულეტენში არ გამოქვეყნდება უფრო ადრინდელი პრიორიტეტის მქონე განაცხადით წარდგენილი დიზაინი, ან თუ უფრო ადრინდელი პრიორიტეტის მქონე განაცხადს უარი ეთქმევა რეგისტრაციაზე.

7. განაცხადის განხილვის შეჩერების თაობაზე განმცხადებელს ეგზავნება შესაბამისი შეტყობინება.

8. საქპატენტი გადაწყვეტილებას დიზაინის რეგისტრაციის ან რეგისტრაციაზე უარის თქმის შესახებ უგზავნის განმცხადებელს.

მუხლი 18. დიზაინის გამოქვეყნება

1. საქპატენტი, კანონის მე-19 მუხლის პირველი და მე-2 პუნქტებით გათვალისწინებულ შემთხვევაში, დიზაინის რეგისტრაციის შესახებ გადაწყვეტილების მიღებიდან ერთი თვის ვადაში ბიულეტენში აქვეყნებს განაცხადის ბიბლიოგრაფიულ მონაცემებს და დიზაინის გამოსახულებას, თუ განმცხადებლის მიერ გადახდილია შესაბამისი საფასური.

2. გამოქვეყნების საფასური განმცხადებელმა უნდა გადაიხადოს დიზაინის რეგისტრაციის შესახებ დადებითი გადაწყვეტილების მიღებიდან 1 თვის ვადაში, წინააღმდეგ შემთხვევაში საქმისწარმოება შეწყდება.

3. თუ განაცხადი შეიცავს რამდენიმე დიზაინს და გამოქვეყნებისათვის გადახდილი საფასური ნაკლებია განაცხადში შემავალი დიზაინების გამოქვეყნებისათვის დადგენილი საფასურის ოდენობაზე, განმცხადებელს ეგზავნება შეტყობინება ხარვეზის დადგენის შესახებ, რომლის მიღებიდან ერთი თვის ვადაში განმცხადებელი ვალდებულია სრულად გადაიხადოს გამოქვეყნების საფასური, ან მიუთითოს, რომელი დიზაინი უნდა გამოქვეყნდეს.

4. თუ განმცხადებელი არ შეასრულებს ამ მუხლის მე-3 პუნქტით გათვალისწინებულ მოთხოვნას, საქპატენტი რიგითობის მიხედვით გამოაქვეყნებს განაცხადში შემავალ იმდენ დიზაინს, რამდენისთვისაც საკმარისია გადახდილი საფასური.

მუხლი 19. გამოქვეყნების გადადება

1. დიზაინის გამოქვეყნების გადადების მოთხოვნის წარდგენა დასაშვებია დიზაინის რეგისტრაციის თაობაზე გადაწყვეტილების გამოტანამდე. გამოქვეყნების გადადების საერთო ვადა არ უნდა აღემატებოდეს კანონის მე-18 მუხლის პირველი პუნქტის „ბ“ ქვეპუნქტით გათვალისწინებულ ვადას.

1¹. დიზაინის გამოქვეყნების გადადების მოთხოვნის წარდგენიდან ერთი თვის ვადაში გადახდილ უნდა იქნეს დადგენილი საფასური, წინააღმდეგ შემთხვევაში მოთხოვნა დარჩება განუხილველი.

2. თუ განაცხადს დაუდგინდა რამდენიმე პრიორიტეტი, გამოქვეყნების გადადების ვადა აითვლება ყველაზე ადრინდელი პრიორიტეტიდან.

3. მრავლობითი განაცხადის შემთხვევაში, განმცხადებელმა უნდა მიუთითოს, მასში შემავალ რომელ დიზაინზე ითხოვს გამოქვეყნების გადადებას.

4. განაცხადზე, რომელზეც მოითხოვება გამოქვეყნების გადადება, საქმისწარმოება მიმდინარეობს კანონით დადგენილი წესით. ეს წესი მოქმედებს იმ შემთხვევაშიც, როდესაც ამ ინსტრუქციის მე-8 მუხლის პირველი პუნქტის შესაბამისად, გამოსახულების ნაცვლად წარმოდგენილია პროდუქტის ნიმუში.

5. თუ დიზაინზე მოითხოვება გამოქვეყნების გადადება, დიზაინის რეგისტრაციის თაობაზე დადებითი გადაწყვეტილების მიღების შემთხვევაში, ბიულეტენში ქვეყნდება მხოლოდ განმცხადებლის სახელი, განაცხადის შეტანის თარიღი, განაცხადის ნომერი, გამოქვეყნების გადადების ამოწურვის თარიღი და კეთდება აღნიშვნა გამოქვეყნების გადადების შესახებ.

6. დიზაინის, რომელზეც მოითხოვება გამოქვეყნების გადადება, რეგისტრაციის თაობაზე დადებითი გადაწყვეტილების მიღების შემთხვევაში, გამოქვეყნების გადადების ვადის ამოწურვის შემდეგ, განმცხადებლის მიერ შესაბამისი საფასურის გადახდის შემთხვევაში, საქპატენტი აქვეყნებს ბიულეტენში განაცხადის მონაცემებს ამ ინსტრუქციის მე-18 მუხლით დადგენილი წესით.

7. განმცხადებელს შეუძლია გააუქმოს გამოქვეყნების გადადება და მოითხოვოს დიზაინის გამოქვეყნება არა უგვიანეს 3 თვით ადრე გამოქვეყნების ვადის ამოწურვამდე.

8. თუ ამ ინსტრუქციის მე-8 მუხლის შესაბამისად წარდგენილია პროდუქტის ნიმუში, განმცხადებელი ვალდებულია, გამოქვეყნების გადადების ვადის ამოწურვამდე სამი თვით ადრე, წარადგინოს დიზაინის გამოსახულება ამ ინსტრუქციის მე-7 მუხლით დადგენილი წესით, წინააღმდეგ შემთხვევაში საქპატენტი გამოიტანს გადაწყვეტილებას საქმისწარმოების შეწყვეტის შესახებ.

მუხლი 20. საგანაცხადო მასალებში ცვლილებების ან/და შესწორების შეტანა განმცხადებლის მოთხოვნით

1. განაცხადზე საქმისწარმოებისას განმცხადებელს უფლება აქვს საგანაცხადო მასალებში შეიტანოს ცვლილებები ან/და შესწორებები.

2. საგანაცხადო მასალებში ცვლილება ან/და შესწორება შეიძლება განხორციელდეს მხოლოდ განმცხადებლის წერილობითი მოთხოვნის საფუძველზე.

3. ცვლილებები ან/და შესწორებები, რომლებიც ეხება დიზაინის გამოსახულებას, პროდუქტის დასახელებას და აღწერილობას, დასაშვებია ფორმალური მოთხოვნების ექსპერტიზის დასრულებამდე, თუ ამ ქმედებით არ იცვლება დიზაინის დაცვის ფარგლები.

4. ცვლილებების ან/და შესწორებების შეტანა, რომელიც ეხება განმცხადებლის, დიზაინერის ან წარმომადგენლის სახელს და მისამართს, დასაშვებია როგორც საქმისწარმოების ეტაპზე, ასევე რეგისტრაციის შემდეგ.

4¹. ამ მუხლის მე-4 პუნქტში მითითებული ცვლილების მოთხოვნის შემთხვევაში, საქპატენტში წარდგენილ უნდა იქნეს ცვლილების დამადასტურებელი საბუთი. თუ მოთხოვნა წარდგენილია წარმომადგენლის მიერ, წარდგენილ უნდა იქნეს წარმომადგენლობის უფლებამოსილების დამადასტურებელი საბუთი.

5. ამ მუხლის მე-3 პუნქტით გათვალისწინებული ცვლილებებისა ან/და შესწორებების შეტანა ხორციელდება საფასურის გადახდის გარეშე.

6. ამ მუხლის მე-4 პუნქტით გათვალისწინებული ცვლილებების ან/და შესწორებების შეტანა განაცხადში ფორმალური მოთხოვნების ექსპერტიზის დასრულებამდე ხდება საფასურის გადახდის გარეშე, ხოლო ფორმალური მოთხოვნების ექსპერტიზის დასრულების შემდეგ, შესაბამისი საფასურის გადახდის შემდეგ.

6¹. ამ მუხლით გათვალისწინებული ქმედებებისთვის, საფასური გადახდილ უნდა იქნეს ცვლილების მოთხოვნიდან ერთი თვის ვადაში, წინააღმდეგ შემთხვევაში მოთხოვნა დარჩება განუხილველი.

6². როგორც საქმისწარმოების ეტაპზე, ისე რეგისტრაციის შემდეგ, მიმოწერის მისამართის ცვლილების მოთხოვნის შემთხვევაში, საფასურის გადახდა არ მოითხოვება.

7. განაცხადში მექანიკური შეცდომების გასწორება ექსპერტიზის ნებისმიერ ეტაპზე ხორციელდება საფასურის გადახდის გარეშე.

მუხლი 21. დამატებითი მასალების, განაცხადში ცვლილებებისა ან/და დამატებების

შეტანის მოთხოვნა საქპატენტის მიერ

1. საქპატენტი უფლებამოსილია ექსპერტიზის ნებისმიერ ეტაპზე განმცხადებლისგან მოითხოვოს დამატებითი მასალების წარდგენა, განაცხადში ცვლილებების ან/და შესწორებების შეტანა, რომელთა გარეშეც შეუძლებელია განაცხადის განხილვის გაგრძელება.

2. ამ მუხლის პირველი პუნქტით გათვალისწინებული ქმედებებისათვის განმცხადებლის მიერ საფასური არ გადაიხდება.

3. განმცხადებელი ვალდებულია საქპატენტის მოთხოვნის ჩაბარებიდან ერთი თვის ვადაში წარადგინოს შესაბამისი მასალები.

4. შესაბამისი საფასურის გადახდის შემთხვევაში, განმცხადებელს უფლება აქვს მოითხოვოს ამ მუხლის მე-3 პუნქტით დადგენილი ვადის გაგრძელება თითო თვით, არა უმეტეს 2 თვისა.

5. განმცხადებლის მიერ წარდგენილი დამატებითი მასალა, რომელიც ავსებს, ცვლის ან აზუსტებს განაცხადს, არ უნდა სცილდებოდეს დიზაინის დაცვის ფარგლებს, წინააღმდეგ შემთხვევაში აღნიშნული მასალა არ განიხილება, რის შესახებაც განმცხადებელს ეგზავნება შეტყობინება.

6. ამ მუხლის პირველი პუნქტით გათვალისწინებული მოთხოვნის შეუსრულებლობის შემთხვევაში საქპატენტს გამოაქვს გადაწყვეტილება განაცხადზე საქმისწარმოების შეწყვეტის შესახებ.

7. მრავლობითი განაცხადის შემთხვევაში ამ მუხლის მე-6 პუნქტში აღნიშნული გადაწყვეტილება შეიძლება ეხებოდეს მასში შემავალ ერთ ან რამდენიმე დიზაინს.

მუხლი 22. განაცხადის განხილვის შეჩერება

1. განმცხადებელს უფლება აქვს დადგენილი საფასურის გადახდის შემთხვევაში, ამ ინსტრუქციის მე-18 მუხლის პირველი პუნქტის შესაბამისად დიზაინის გამოქვეყნებამდე, მოითხოვოს განაცხადის განხილვის შეჩერება თითო თვით, არა უმეტეს 6 თვისა.

2. ამ მუხლის პირველი პუნქტით განსაზღვრული უფლება არ ვრცელდება განაცხადის შეტანის თარიღის დადასტურებისას საქპატენტის მიერ მოთხოვნილი მასალების წარდგენასა და ამ ინსტრუქციით გათვალისწინებული საფასურის გადახდისათვის დადგენილი ვადების გაგრძელებაზე.

3. განაცხადის განხილვის შეჩერების შესახებ, განცხადების წარდგენიდან 1 თვის ვადაში, გადახდილ უნდა იქნეს დადგენილი საფასური. წინააღმდეგ შემთხვევაში მოთხოვნა განაცხადის განხილვის შეჩერების შესახებ დარჩება განუხილველი.

მუხლი 23. ვადის დარღვევის გამო განაცხადთან დაკავშირებული დაკარგული უფლებების აღდგენა

1. თუ განაცხადზე საქმისწარმოება შეწყვეტილია განმცხადებლის მიერ კანონითა და ამ ინსტრუქციით დადგენილი ვადების დარღვევის გამო, განმცხადებელი უფლებამოსილია მოითხოვოს საქმისწარმოების აღდგენა.

2. ამ მუხლის პირველი პუნქტით გათვალისწინებული უფლებით განმცხადებელს შეუძლია ისარგებლოს საქპატენტის მიერ განაცხადზე საქმისწარმოების შეწყვეტის შესახებ გადაწყვეტილების გამოტანიდან ექვსი თვის ვადაში, საქმისწარმოების შეწყვეტის მიზეზის აღმოფხვრისა და შესაბამისი საფასურის გადახდის შემთხვევაში.

3. საქპატენტი საქმისწარმოების აღდგენის შესახებ განცხადებას განიხილავს მიღებიდან ერთი თვის ვადაში და თუ იგი აკმაყოფილებს ამ მუხლის მე-2 პუნქტით გათვალისწინებულ მოთხოვნებს, იღებს გადაწყვეტილებას განაცხადზე საქმისწარმოების აღდგენის შესახებ.

მუხლი 24. განაცხადის გამოთხოვა

1. დიზაინის გამოქვეყნებამდე განმცხადებელს უფლება აქვს გამოითხოვოს განაცხადი.

2. საქპატენტს განაცხადის გამოთხოვის შესახებ განცხადების საფუძველზე გამოაქვს გადაწყვეტილება განაცხადზე საქმისწარმოების შეწყვეტის შესახებ.

2¹. განაცხადი გამოთხოვილად მიიჩნევა განაცხადზე საქმისწარმოების შეწყვეტის შესახებ ჩანაწერის რეესტრში შეტანის დღიდან.

3. განაცხადის გამოთხოვის შემთხვევაში დაუშვებელია განაცხადზე საქმისწარმოების აღდგენა.

4. მრავლობითი განაცხადის შემთხვევაში ამ მუხლის პირველი, მე-2 და მე-3 პუნქტები შეიძლება ეხებოდეს განაცხადში შემავალ ერთ ან რამდენიმე დიზაინს.

მუხლი 25. განაცხადის დამოწმებული ასლის მოთხოვნა

1. განმცხადებელს განაცხადის შეტანის თარიღის დადასტურების შემდეგ, უფლება აქვს მოითხოვოს განაცხადის დამოწმებული ასლი.

2. საგანაცხადო მასალების დამოწმებული ასლის მოთხოვნის შესახებ განცხადების საქპატენტში წარდგენიდან ერთი თვის ვადაში გადახდილ უნდა იქნეს დადგენილი საფასური.

3. საგანაცხადო მასალების დამოწმებულ ასლს საქპატენტი გასცემს ამ მუხლის მე-2 პუნქტით განსაზღვრული საფასურის გადახდიდან ათი დღის ვადაში.

4. განმცხადებლის მოთხოვნით საქპატენტის მიერ საგანაცხადო მასალების დამოწმებული ასლის გაცემა შესაძლებელია, ასევე, „DAS“-ის მეშვეობით.

5. საგანაცხადო მასალების დამოწმებული ასლის გაცემის საფასურის ამ მუხლის მე-2 პუნქტში მითითებულ ვადაში გადაუხდელობის შემთხვევაში, მოთხოვნა დარჩება განუხილველი.

6. დამოწმებული ასლი აისახება ელექტრონულ სისტემაში. მისი მატერიალური ფორმით გაცემა განხორციელდება განმცხადებლის მოთხოვნის შემთხვევაში.

მუხლი 26. საერთაშორისო დიზაინის ექსპერტიზა

1. კანონის 25-ე მუხლის და ამ ინსტრუქციით დადგენილი წესის შესაბამისად, საქპატენტი საერთაშორისო დიზაინზე ატარებს არსობრივ ექსპერტიზას საერთაშორისო ბიულეტენში დიზაინის გამოქვეყნებიდან 3 თვის ვადაში.

2. კანონის 25-ე მუხლის მე-2 პუნქტის თანახმად, საერთაშორისო დიზაინის რეგისტრაციის მოქმედების საქართველოს ტერიტორიაზე გავრცელებაზე უარის თქმის შესახებ გადაწყვეტილების გამოტანის შემთხვევაში, საქპატენტი დიზაინის საერთაშორისო ბიულეტენის გამოქვეყნებიდან 6 თვის განმავლობაში ატყობინებს ამის თაობაზე საერთაშორისო ბიუროს.

3. თუ საერთაშორისო დიზაინი აკმაყოფილებს კანონის 25-ე მუხლით დადგენილ მოთხოვნებს, საქპატენტს გამოაქვს გადაწყვეტილება საერთაშორისო დიზაინის რეგისტრაციის მოქმედების საქართველოს ტერიტორიაზე გავრცელების თაობაზე და გადაწყვეტილების გამოტანიდან 3 თვის ვადაში უგზავნის შეტყობინებას საერთაშორისო ბიუროს.

4. საქპატენტი საერთაშორისო დიზაინის რეგისტრაციის მოქმედების საქართველოს ტერიტორიაზე გავრცელების თაობაზე გადაწყვეტილების მიღებიდან ერთი თვის ვადაში განაცხადის მონაცემებს და დიზაინის გამოსახულებას აქვეყნებს ბიულეტენში.

5. დაინტერესებულ პირს უფლება აქვს საერთაშორისო დიზაინის რეგისტრაციის მოქმედების საქართველოს ტერიტორიაზე გავრცელების თაობაზე საქპატენტის მიერ მიღებული გადაწყვეტილება გაასაჩივროს კანონის მე-20 მუხლით დადგენილი წესით.

6. თუ კანონის მე-20 მუხლის მე-5 პუნქტით დადგენილ ვადაში გადაწყვეტილება საერთაშორისო დიზაინის რეგისტრაციის მოქმედების საქართველოს ტერიტორიაზე გავრცელების თაობაზე არ გასაჩივრდა, საერთაშორისო დიზაინის რეგისტრაციის მოქმედება საქართველოს ტერიტორიაზე ძალაში შედის საერთაშორისო რეგისტრაციის თარიღიდან.

7. თუ კანონის მე-20 მუხლის მე-5 პუნქტით დადგენილ ვადაში გადაწყვეტილება საერთაშორისო დიზაინის რეგისტრაციის მოქმედების საქართველოს ტერიტორიაზე გავრცელების ან გავრცელებაზე უარის შესახებ გასაჩივრდა სააპელაციო პალატაში ან სასამართლოში, რის საფუძველზეც სააპელაციო პალატის ან სასამართლოს კანონიერ ძალაში შესული გადაწყვეტილებით საერთაშორისო დიზაინის რეგისტრაციის მოქმედება გავრცელდა საქართველოს ტერიტორიაზე, რეგისტრაციის მოქმედება საქართველოს ტერიტორიაზე ძალაში შევა საერთაშორისო რეგისტრაციის თარიღიდან.

8. ამ მუხლის მე-6 და მე-7 პუნქტებით გათვალისწინებულ შემთხვევაში ინფორმაცია საერთაშორისო დიზაინის რეგისტრაციის მოქმედების საქართველოს ტერიტორიაზე გავრცელების თაობაზე ერთი თვის ვადაში ქვეყნდება ბიულეტენში.

9. (ამოღებულია - 13.09.2021 №4).

10. საქპატენტს ინფორმაცია კანონის 28-ე მუხლის პირველი პუნქტის „ა“ და „ბ“ ქვეპუნქტების საფუძველზე, საერთაშორისო დიზაინის რეგისტრაციის მოქმედების საქართველოს ტერიტორიაზე გაუქმების შესახებ შეაქვს ელექტრონულ სისტემაში და აქვეყნებს ბიულეტენში.

11. საქპატენტს სასამართლო გადაწყვეტილების საფუძველზე, საერთაშორისო დიზაინის რეგისტრაციის მოქმედების საქართველოს ტერიტორიაზე ბათილად ცნობის შესახებ ინფორმაცია შეაქვს ელექტრონულ სისტემაში, აქვეყნებს ბიულეტენში და აცნობებს საერთაშორისო ბიუროს.

მუხლი 26¹. საერთაშორისო განაცხადის წარდგენა საქპატენტის მეშვეობით

1. განმცხადებელს უფლება აქვს დიზაინის საერთაშორისო რეგისტრაციის მიზნით განაცხადი ისმოს საერთაშორისო ბიუროში შეიტანოს საქპატენტის მეშვეობით.

2. საქპატენტის მეშვეობით განაცხადის წარდგენის შემთხვევაში განმცხადებელმა უნდა მიმართოს საქპატენტს შესაბამისი განცხადებით და წარადგინოს საერთაშორისო განაცხადი, რომელიც შედგება სათანადოდ შევსებული ისმოს მიერ დადგენილი (DM/1) განაცხადის ბლანკისგან და დიზაინის გამოსახულებისაგან. თუ განაცხადი წარდგენილია განმცხადებლის წარმომადგენლის მიერ, საგანაცხადო მასალებს უნდა ერთოდეს განმცხადებლის მიერ გაცემული წარმომადგენლობის უფლებამოსილების დამადასტურებელი საბუთი.

3. წარდგენილი საერთაშორისო განაცხადი უნდა აკმაყოფილებდეს ჰააგის შეთანხმების მოთხოვნებს.

4. საქპატენტის მეშვეობით საერთაშორისო განაცხადის წარდგენის შემთხვევაში განაცხადი უნდა შეივსოს ინგლისურ ენაზე და საერთაშორისო ბიუროსთვის გადახდილ უნდა იქნეს ჰააგის შეთანხმებით განსაზღვრული საფასური.

5. საქპატენტის მეშვეობით საერთაშორისო განაცხადის წარდგენის შემთხვევაში, განმცხადებლის სახელზე გაიცემა ცნობა საგანაცხადო მასალების მიღების შესახებ, რომელშიც მიეთითება საგანაცხადო მასალების გვერდების რაოდენობა და წარდგენის თარიღი.

6. საერთაშორისო განაცხადის მიღებიდან ათი დღის ვადაში საქპატენტი ამოწმებს გადახდილი საფასურის ოდენობას და საგანაცხადო მასალების შესაბამისობას ჰააგის შეთანხმების მოთხოვნებთან.

7. თუ საგანაცხადო მასალები არ აკმაყოფილებს ამ მუხლით გათვალისწინებულ მოთხოვნებს, განმცხადებელს ეგზავნება შეტყობინება ერთი თვის ვადაში აღნიშნული ხარვეზის შევსების თაობაზე. ამ მოთხოვნის შესრულების შემთხვევაში საგანაცხადო მასალების წარდგენის თარიღად ჩაითვლება ხარვეზის შევსების თარიღი.

8. თუ ამ მუხლის მე-7 პუნქტით გათვალისწინებული ხარვეზი არ იქნება შევსებული დადგენილ ვადაში, განცხადება დარჩება განუხილველი.

9. თუ საერთაშორისო განაცხადი აკმაყოფილებს ამ მუხლით დადგენილ მოთხოვნებს, საქპატენტი უზრუნველყოფს მის გაგზავნას საერთაშორისო ბიუროში, საერთაშორისო განაცხადის მასალების საქპატენტში წარდგენის ან ხარვეზის შევსების თარიღიდან ერთი თვის ვადაში.

10. საქპატენტი განმცხადებელს აცნობებს საერთაშორისო განაცხადის საერთაშორისო ბიუროში გაგზავნის ფაქტის შესახებ გაგზავნიდან 5 დღის ვადაში.

თავი IV

დიზაინის რეგისტრაცია

მუხლი 27. დიზაინის რეგისტრაციის და მოწმობის გაცემის წესი

1. განმცხადებლის მიერ საფასურის გადახდის შემთხვევაში, კანონის 21-ე მუხლის შესაბამისად, საქპატენტი არეგისტრირებს დიზაინს რეესტრში. რეგისტრირებულ მონაცემებს აქვეყნებს ბიულეტენში და გასცემს მოწმობას.

2. დიზაინის რეგისტრაციის საფასურის გადახდის შესახებ შეტყობინება განმცხადებელს საქპატენტის მიერ ეგზავნება კანონის 21-ე მუხლის პირველი პუნქტის შესაბამისად, ერთი თვის ვადაში.

3. რეგისტრაციისა და დიზაინის რეგისტრაციის პირველი ხუთი წლით ძალის შენარჩუნებისათვის დადგენილი საფასური გადაიხდება ერთდროულად, განმცხადებლისათვის ამ მუხლის მე-2 პუნქტით გათვალისწინებული შეტყობინების ჩაბარებიდან ერთი თვის ვადაში. საფასურის გადაუხდელობის შემთხვევაში, განაცხადზე საქმისწარმოება წყდება.

4. თუ განაცხადი შეიცავს რამდენიმე დიზაინს, ხოლო რეგისტრაციისათვის და პირველი ხუთი წლით ძალის შენარჩუნებისათვის გადახდილი საფასური ნაკლებია განაცხადში შემავალი დიზაინების რეგისტრაციისათვის და პირველი ხუთი წლით ძალის შენარჩუნებისათვის დადგენილი საფასურის ოდენობაზე, განმცხადებელს ეგზავნება შეტყობინება ხარვეზის დადგენის შესახებ, რომლის მიღებიდან ერთი თვის ვადაში განმცხადებელი ვალდებულია სრულად გადაიხადოს რეგისტრაციისა და პირველი ხუთი წლით ძალის შენარჩუნებისათვის დადგენილი საფასური, ან მიუთითოს, რომელი დიზაინი უნდა დარეგისტრირდეს.

5. თუ განმცხადებელი არ შეასრულებს ამ მუხლის მე-4 პუნქტით გათვალისწინებულ მოთხოვნას, საქპატენტი რიგითობის მიხედვით დაარეგისტრირებს განაცხადში შემავალ იმდენ დიზაინს, რამდენისთვისაც საკმარისია გადახდილი საფასური.

6. დიზაინის რეგისტრაციის დღიდან ერთი თვის ვადაში საქპატენტი გასცემს თავმჯდომარის მიერ ხელმოწერილ მოწმობას, რომელიც დამოწმებული იქნება ბეჭდით.

6¹. დიზაინის რეგისტრაციის მოწმობის ფორმა მტკიცდება საქპატენტის თავმჯდომარის ბრძანებით.

6². დიზაინის რეგისტრაციის მოწმობა აისახება ელექტრონულ სისტემაში და, განაცხადზე მატერიალური ფორმით საქმისწარმოების შემთხვევაში, მფლობელს გადაეცემა მატერიალური ფორმით, ხოლო ელექტრონული ფორმით საქმისწარმოების შემთხვევაში, მისი მატერიალური ფორმით გაცემა განხორციელდება მფლობელის მოთხოვნის შემთხვევაში მოთხოვნიდან 5 დღის ვადაში.

7. საქპატენტი აქვეყნებს მონაცემებს იმ დიზაინების შესახებ, რომლებიც იყო გამოქვეყნებული, მაგრამ არ დარეგისტრირდა.

მუხლი 27¹. დიზაინის დაჩქარებული რეგისტრაცია

1. დიზაინის დაჩქარებული რეგისტრაციის პროცედურა ხორციელდება კანონის 22-ე მუხლით და ამ ინსტრუქციით დადგენილი წესით.

2. განაცხადს დაჩქარებული რეგისტრაციის მოთხოვნით უდასტურდება შეტანის თარიღი და მისი ფორმალური მოთხოვნების ექსპერტიზა ტარდება განაცხადის შეტანიდან სამი დღის ვადაში, თუ გადახდილია დაჩქარებული რეგისტრაციისათვის დადგენილი შესაბამისი საფასური.

3. თუ განაცხადი წარდგენილია კანონისა და ამ ინსტრუქციით დადგენილი წესების დაცვით, საქპატენტი იღებს გადაწყვეტილებას ფორმალური მოთხოვნების ექსპერტიზის დასრულების შესახებ.

4. თუ განაცხადი არ აკმაყოფილებს კანონის 22-ე მუხლის მე-5 პუნქტით გათვალისწინებულ მოთხოვნებს, განმცხადებელს ეგზავნება შეტყობინება ხარვეზის დადგენის შესახებ და ხარვეზის შესავსებად ეძლევა შეტყობინების ჩაბარებიდან 15 დღე. თუ აღნიშნულ ვადაში განმცხადებელი არ შეავსებს გამოვლენილ ხარვეზს, საქპატენტი იღებს გადაწყვეტილებას დაჩქარებული ექსპერტიზის ჩატარებაზე უარის თქმის შესახებ და განაცხადს განიხილავს კანონითა და ამ ინსტრუქციის მე-3 თავით დადგენილი წესით.

5. ამ მუხლის მე-4 პუნქტით გათვალისწინებულ შემთხვევაში, თუ საქპატენტის მიერ გამოტანილ იქნება გადაწყვეტილება დაჩქარებული ექსპერტიზის ჩატარებაზე უარის თქმის შესახებ, განმცხადებელს შესაბამისი განცხადების საფუძველზე, უბრუნდება დაჩქარებული რეგისტრაციისათვის გადახდილი საფასურის 50%.

6. ფორმალური მოთხოვნების ექსპერტიზის დასრულებიდან 7 დღის ვადაში საქპატენტი ატარებს არსობრივ ექსპერტიზას კანონის მე-17 მუხლის შესაბამისად, რის შედეგადაც იღებს გადაწყვეტილებას დიზაინის რეგისტრაციის ან რეგისტრაციაზე უარის თქმის შესახებ.

7. საქპატენტი, დიზაინის გამოქვეყნებისა და რეგისტრაციისათვის დადგენილი საფასურის გადახდის შემთხვევაში, არეგისტრირებს დიზაინს რეესტრში, რეგისტრირებული დიზაინის შესახებ მონაცემებს აქვეყნებს ბიულეტენში და გასცემს მოწმობას დაჩქარებული რეგისტრაციის თაობაზე გადაწყვეტილების მიღებიდან ერთი თვის ვადაში ამ ინსტრუქციის 27-ე მუხლის 6 – 6² პუნქტებით განსაზღვრული წესით.

8. კანონის 22-ე მუხლის მე-8 პუნქტით გათვალისწინებულ შემთხვევაში, დაჩქარებული რეგისტრაციისათვის გადახდილი საფასური უკან არ ბრუნდება.

მუხლი 28. საფასურის გადახდის წესი

1. თუ კანონით ან ამ ინსტრუქციით სხვა რამ არ არის დადგენილი, საფასურის გადახდა უნდა მოხდეს საქპატენტის შესაბამისი მოთხოვნის მიღებიდან ერთი თვის ვადაში.

2. განმცხადებლის, დიზაინის მფლობელის, ან/და მესამე პირის მოთხოვნის საფუძველზე, საქპატენტის მიერ კანონით გათვალისწინებული ქმედების განხორციელებისათვის საფასურის გადახდა ხდება ასეთი ქმედების მოთხოვნით საქპატენტისთვის მიმართვიდან ერთი თვის ვადაში, წინააღმდეგ შემთხვევაში მოთხოვნა დარჩება განუხილველი.

3. საფასურის გადახდისათვის დადგენილი ვადის გაგრძელება არ დაიშვება, გარდა ამ ინსტრუქციით გათვალისწინებული შემთხვევისა.

4. იმ შემთხვევაში, თუ საფასური გადახდილია ისეთი ქმედებისთვის, რომელიც არ შესრულდა, შესაბამისი განცხადების საფუძველზე საქპატენტი აბრუნებს გადახდილ თანხას.

5. თუ განაცხადი შეტანილია რამდენიმე განმცხადებლის მიერ, რომელთაგან ერთ-ერთზე არ ვრცელდება კანონმდებლობით გათვალისწინებული საფასურებთან დაკავშირებული შეღავათი, შესაბამისი ქმედებისთვის საფასური გადაიხდება შეღავათის გარეშე.

6. თუ განაცხადი შეტანილია რამდენიმე განმცხადებლის მიერ და მათზე ვრცელდება კანონმდებლობით გათვალისწინებული სხვადასხვა სახის შეღავათი, შესაბამისი ქმედებისათვის გადაიხდება ის საფასური, რომლისთვისაც გათვალისწინებულია უფრო დაბალპროცენტიანი შეღავათი.

7. ს აფასურის გადახდა უნდა მოხდეს უნაღდო ანგარიშსწორებით, საქპატენტის სახაზინო ანგარიშზე.

მუხლი 29. საქმისწარმოების აღდგენის საფასური

საქმისწარმოების შეწყვეტიდან 6 თვის ვადაში საქმისწარმოების აღდგენისათვის გადაიხდება მხოლოდ საქმისწარმოების აღდგენის საფასური. თუ საქმისწარმოება შეწყვეტილია შესაბამისი ქმედებისთვის საფასურის გადაუხდელობის გამო, საქმისწარმოების აღდგენის საფასურთან ერთად ასევე გადაიხდება ამ ქმედებისათვის დადგენილი საფასური.

მუხლი 30. დიზაინის რეგისტრაციის მოქმედების ვადის გაგრძელება და რეგისტრაციის ძალის შენარჩუნების საფასური

1. დიზაინის რეგისტრაცია შეიძლება გაგრძელდეს მეორე, მესამე, მეოთხე და მეხუთე ხუთწლიანი პერიოდით. დიზაინის რეგისტრაციის მოქმედების ვადას აგრძელებს საქპატენტი, დიზაინის მფლობელის მიერ საქპატენტში წარდგენილი განცხადების საფუძველზე, დადგენილი წესით განსაზღვრული საფასურის გადახდის შემდგომ.

2. ამ მუხლის პირველ პუნქტში აღნიშნული განცხადების საქპატენტში წარდგენა და შესაბამისი საფასურის გადახდა ხდება მიმდინარე ხუთწლიანი პერიოდის მეხუთე წლის განმავლობაში.

3. მიმდინარე ხუთწლიანი პერიოდის ამოწურვამდე 3 თვით ადრე საქპატენტი უფლებამოსილია, მფლობელს, დამატებითი ინფორმირების სახით, გაუგზავნოს შეტყობინება ამ მუხლის პირველ პუნქტში აღნიშნული საფასურის გადახდის მოთხოვნით. მფლობელისათვის აღნიშნული შეტყობინების ჩაუბარებლობა არ ახდენს გავლენას დიზაინის რეგისტრაციის მოქმედების გაუქმების გადაწყვეტილებაზე.

4. შემდგომი ხუთწლიანი პერიოდით რეგისტრაციის მოქმედების გაგრძელებისათვის გათვალისწინებული საფასური გადახდილ უნდა იქნეს ამ მუხლის პირველ პუნქტში აღნიშნული განცხადების საქპატენტში შეტანიდან ერთი თვის ვადაში, წინააღმდეგ შემთხვევაში მოთხოვნა დარჩება განუხილველი.

5. მეორე, მესამე, მეოთხე და მეხუთე ხუთწლიანი პერიოდებისათვის დიზაინის რეგისტრაციის ძალის შენარჩუნების საფასურის ამ მუხლის მეორე პუნქტით გათვალისწინებულ ვადაში გადაუხდელობის შემთხვევაში, მფლობელს საფასურის გადახდისათვის ეძლევა ექვსთვიანი საშეღავათო პერიოდი, რომელიც მოიცავს დიზაინის რეგისტრაციის მოქმედების მიმდინარე ხუთწლიანი პერიოდის ამოწურვის თარიღიდან მომდევნო ექვს თვეს.

6. ამ მუხლის მე-5 პუნქტით გათვალისწინებული საშეღავათო პერიოდის განმავლობაში მფლობელის მიერ საფასურის გადაუხდელობის შემთხვევაში დიზაინის რეგისტრაცია უქმდება.

მუხლი 31 (ამოღებულია)

მუხლი 32. ქმედებები რეესტრში

1. დიზაინის მფლობელს უფლება აქვს, სათანადო განცხადების წარდგენით, შესაბამისი საფასურის გადახდის შემთხვევაში, მოითხოვოს რეესტრში ცვლილების შეტანა. ცვლილება შეიძლება ეხებოდეს დიზაინერის, მფლობელის ან მისი წარმომადგენლის სახელს და/ან მისამართს. საფასური გადახდილ უნდა იქნეს განცხადების წარდგენიდან ერთი თვის ვადაში, წინააღმდეგ შემთხვევაში მოთხოვნა დარჩება განუხილველი.

2. ამ მუხლის პირველ პუნქტში მითითებული ცვლილების მოთხოვნის შემთხვევაში საქპატენტში წარდგენილ უნდა იქნეს ცვლილების დამადასტურებელი საბუთი. იმ შემთხვევაში, თუ განცხადება წარდგენილია წარმომადგენლის მიერ, საქპატენტს უნდა წარედგინოს მფლობელის მიერ გაცემული წარმომადგენლობის უფლებამოსილების დამადასტურებელი საბუთი.

3. წარმომადგენლის ცვლილების მოთხოვნის შემთხვევაში აუცილებელია მფლობელის მიერ გაცემული, ახალი წარმომადგენლობის უფლებამოსილების დამადასტურებელი საბუთის წარდგენა.

4. უფლებების გადაცემის, ლიცენზიის, ან გირავნობის ხელშეკრულებების რეგისტრაციის მოთხოვნით საქპატენტისთვის მიმართვის შემთხვევაში წარდგენილ უნდა იქნეს მხარეებს შორის გაფორმებული ხელშეკრულება. იმ შემთხვევაში, თუ განცხადება წარდგენილია წარმომადგენლის მიერ, ხელშეკრულებასთან ერთად წარდგენილ უნდა იქნეს ერთ-ერთი მხარის მიერ გაცემული წარმომადგენლობის უფლებამოსილების დამადასტურებელი საბუთი.

5. ამ მუხლის მე-4 პუნქტში აღნიშნული ქმედებების რეესტრში ასახვისათვის, დადგენილი საფასური გადახდილ უნდა იქნეს მიმართვიდან ერთი თვის ვადაში, წინააღმდეგ შემთხვევაში მოთხოვნა დარჩება განუხილველი.

6. ყადაღის რეგისტრაციის მოთხოვნით საქპატენტისთვის მიმართვის შემთხვევაში წარდგენილ უნდა იქნეს შესაბამისი ორგანოს ან სასამართლოს მიერ გაცემული საბუთი.

7. თუ წარდგენილი დოკუმენტაცია არ აკმაყოფილებს ამ მუხლით დადგენილ მოთხოვნებს, მფლობელს ეგზავნება შეტყობინება ერთი თვის ვადაში ხარვეზის შევსების შესახებ. ამ მოთხოვნის შეუსრულებლობის შემთხვევაში მფლობელის განცხადება რჩება განუხილველი.

8. საქპატენტს შესაბამისი ცვლილებები მიმართვიდან ერთი თვის ვადაში შეაქვს რეესტრში და აქვეყნებს ბიულეტენში.

9. დიზაინის რეგისტრაციის მოქმედების გაგრძელების, გაუქმების, ან ბათილად ცნობის შემთხვევაში, საქპატენტს შესაბამისი ცვლილებები შეაქვს რეესტრში და აქვეყნებს ბიულეტენში.

10. რეესტრში განხორციელებული ცვლილების, უფლებების გადაცემის, ასევე, ლიცენზიის, ან გირავნობის ხელშეკრულების რეგისტრაციის შემთხვევაში, გაიცემა მოწმობის დანართი. დანართი იბეჭდება საქპატენტის თავმჯდომარის მიერ დამტკიცებულ ბლანკზე, რომელსაც ხელს აწერს საქპატენტის თავმჯდომარე და დასტურდება ბეჭდით. მოწმობის დანართი აისახება ელექტრონულ სისტემაში და, განცხადებაზე მატერიალური ფორმით საქმისწარმოების შემთხვევაში, მფლობელს გადაეცემა მატერიალური ფორმით, ხოლო ელექტრონული ფორმით საქმისწარმოების შემთხვევაში, მისი მატერიალური ფორმით გაცემა განხორციელდება მფლობელის მოთხოვნის საფუძველზე, მოთხოვნიდან 5 დღის ვადაში.

მუხლი 33. დუბლიკატის გაცემა

1. დიზაინის მფლობელის ან მისი წარმომადგენლის მიერ საქპატენტისთვის განცხადებით მიმართვისა და შესაბამისი საფასურის გადახდის შემთხვევაში, დასაშვებია გაიცეს დიზაინის მოწმობის დუბლიკატი.

2. დუბლიკატი გაიცემა მხოლოდ იმ შემთხვევაში, თუ დიზაინის რეგისტრაცია ძალაშია.

3. თუ განცხადება წარდგენილია წარმომადგენლის მიერ, განცხადებასთან ერთად წარდგენილ უნდა იქნეს ასევე მფლობელის მიერ გაცემული წარმომადგენლობის უფლებამოსილების დამადასტურებელი საბუთი.

4. დიზაინის მოწმობის დუბლიკატის მოთხოვნისათვის დადგენილი საფასური გადახდილ უნდა იქნეს მიმართვიდან ერთი თვის ვადაში, წინააღმდეგ შემთხვევაში განცხადება დარჩება განუხილველი.

5. საქპატენტი დუბლიკატს გასცემს შესაბამისი საფასურის გადახდიდან ათი დღის ვადაში.

6. დიზაინის მოწმობის დუბლიკატი გაიცემა 27-ე მუხლის 6¹ პუნქტით განსაზღვრული ფორმით ამ დუბლიკატის გაცემის პერიოდისათვის რეესტრში არსებული მონაცემების შესაბამისად და ზედა მარჯვენა კუთხეში დასტურდება შტამპით „დუბლიკატი“.

7. დუბლიკატი აისახება ელექტრონულ სისტემაში და, განცხადებაზე მატერიალური ფორმით საქმისწარმოების შემთხვევაში, მფლობელს გადაეცემა მატერიალური ფორმით, ხოლო ელექტრონული ფორმით საქმისწარმოების შემთხვევაში, მისი მატერიალური ფორმით გაცემა განხორციელდება მფლობელის მოთხოვნის საფუძველზე, მოთხოვნიდან 5 დღის ვადაში.

მუხლი 34. ამონაწერი რეესტრიდან

1. ნებისმიერ პირს, საქპატენტისთვის განცხადებით მიმართვის შემთხვევაში, უფლება აქვს მოითხოვოს ამონაწერი რეესტრიდან.

2. რეესტრიდან ამონაწერის მისაღებად გადაიხდება კანონმდებლობით დადგენილი საფასური. საფასური გადახდილ უნდა იქნეს საქპატენტში მოთხოვნის წარდგენიდან ერთი თვის ვადაში, წინააღმდეგ შემთხვევაში განცხადება დარჩება განუხილველი.

3. ამონაწერი გაიცემა საფასურის გადახდიდან 10 დღის ვადაში უფლებამოსილი პირის ხელმოწერით და აისახება მონაცემთა ბაზაში ელექტრონული ფორმით, ხოლო მატერიალური ფორმით გაიცემა განმცხადებლის მოთხოვნის შემთხვევაში.