ბერნში გეოგრაფიული აღნიშვნების ურთიერთაღიარების საკითხზე მოლაპარაკებები გაიმართა

2017 წლის 25-26 ოქტომბერს, შვეიცარიაში, ქ. ბერნში, ,,საქართველოსა და შვეიცარიის კონფედერაციას შორის გეოგრაფიული აღნიშვნებისა და ადგილწარმოშობის დასახელებების ურთიერთაღიარებისა და დაცვის შესახებ“ შეთანხმების ტექსტის მიღების მიზნით, საქართველოსა და შვეიცარიის მხარეებს შორის მოლაპარაკებების მეორე რაუნდი გაიმართა. 

შეხვედრაზე მხარეები შეჯერდნენ პროექტის საბოლოო ტექსტზე, რომლის მიღების შემთხვევაში, ქართული გეოგრაფიული აღნიშვნები და ადგილწარმოშობის დასახელებები, ნაცვალგების წესით დაიცვება შვეიცარიის ტერიტორიაზე. შეთანხმება, ასევე მიმართული იქნება გეოგრაფიული აღნიშვნების დაცვასა და გამოყენებასთან დაკავშირებული საკითხების დარეგულირებაზე.

მოლაპარაკებებში შვეიცარიის მხრიდან მონაწილეობა მიიღეს შვეიცარიის ინტელქტუალური საკუთრების ფედერალური ინსტიტუტის წარმომადგენლებმა, ხოლო საქართველოს მხრიდან - საქპატენტის თავმჯდომარემ ნიკოლოზ გოგილიძემ, ასევე, საქართველოს სოფლის მეურნეობისა და საგარეო საქმეთა სამინისტროების წარმომადგენლებმა.

მოლაპარაკებების პირველი რაუნდი გაიმართა საქართველოში, 2017 წლის 20-21 აგვისტოს.