სამუშაო შეხვედრა - საპატენტო კანონში განხორციელებულ ცვლილებებთან დაკავშირებით

13-14 ივნისს (2018წ.), ვაჭრობის მსოფლიო ორგანიზაციისა (WTO) და ინტელექტუალური საკუთრების ეროვნული ცენტრის საქპატენტის ორგანიზებით, გაიმართა სამუშაო შეხვედრა, რომლის მიზანი იყო, საქართველოსა და ევროკავშირს შორის ასოცირების შესახებ შეთანხმებით გათვალისწინებული ვალდებულებების შესაბამისად, საქართველოს საპატენტო კანონში 2018 წლის 11 იანვარს ძალაში შესული ცვლილებების საფუძველზე, „პატენტით დაცული გამოგონების და სასარგებლო მოდელის გამოყენებისათვის სავალდებულო ლიცენზიების გაცემის წესის“ დამტკიცების შესახებ დადგენილების პროექტის ტექსტის შემუშავება. შეხვედრაზე განხილულ იქნა გამოგონებების დაცვის სტანდარტები TRIPS-ის შეთანხმებისა და სამრეწველო საკუთრების დაცვის პარიზის კონვენციის შესაბამისად, საპატენტო უფლებების გამონაკლისები და შეზღუდვები, ასევე სპეციალურ სავალდებულო ლიცენზირების სისტემასთან დაკავშირებული საკითხები.

საქპატენტის ოფისში მიმდინარე ორდღიანი სამუშაო შეხვედრა გახსნა საქართველოს ეკონომიკისა და მდგრადი განვითარების მინისტრის მოადგილემ, ირმა ქავთარაძემ. შეხვედრას WTO-ს წარმომადგენელთან ერთად, ესწრებოდნენ ჯანმრთელობის მსოფლიო ორგანიზაციისა (WHO) და ინტელექტუალური საკუთრების მსოფლიო ორგანიზაციის (WIPO) ექსპერტები, ასევე, შესაბამისი საჯარო უწყებებისა და პარლამენტის წარმომადგენლები.

საქართველოს საპატენტო კანონით გათვალისწინებული სავალდებულო ლიცენზირების ფარგლებში, პატენტის მფლობელის ნებართვის გარეშე, შესაძლებელია გაიცეს პატენტით დაცული გამოგონების ან/და სასარგებლო მოდელის საქართველოს ტერიტორიის ფარგლებში გამოყენებისათვის სავალდებულო ლიცენზია, სტიქიური უბედურების, კატასტროფის, ეპიდემიის, თავდაცვის, საზოგადოებრივი ჯანმრთელობის დაცვის დროს. აღნიშნული მექანიზმების დანერგვა ხელს შეუწყობს საქართველოში საზოგადოებრივი ჯანმრთელობის დაცვის გარანტიების უზრუნველყოფას და პატენტზე უფლებების ბოროტად გამოყენების შესაძლებლობის აღკვეთას.