| ENGLISH |
 |
 |
დღეს, 25 ივლისს (2019 წ.), ინტელექტუალური საკუთრების ეროვნული ცენტრის - საქპატენტის სათაო ოფისში, გაიმართა ევროკავშირის მიერ დაფინანსებული მიმდინარე დაძმობილების პროექტის (GE/16 ENI EC 0318) ‘’საქართველოში გეოგრაფიული აღნიშვნების ეფექტური დაცვისა და კონტროლის სისტემის დანერგვის“ მმართველი კომიტეტის რიგით მეორე შეხვედრა, სადაც წარდგენილ იქნა პროექტის მომდევნო 6 თვის სამუშაო გეგმა და შესრულებული სამუშაოები.
ზემოაღნიშნული გეგმა ითვალისწინებს საქართველოში მოქმედი კანონმდებლობის, მათ შორის, კანონქვემდებარე აქტების შესწავლას, გადამუშავებას და, საჭიროების შემთხვევაში, ახალი მარეგულირებელი აქტების შემუშავებას. ამასთან, გეგმის თანახმად, მოხდება პროექტში ჩართული ბენეფიციარებისა და მწარმოებელთა გაერთიანებების/ასოციაციების რესურსების შეფასება, მათი საჭიროებების დადგენის მიზნით. გეოგრაფიული აღნიშვნების სისტემის ეფექტური ფუნქციონირების უზრუნველსაყოფად მნიშვნელოვანია მონაწილე უწყებებს შორის ეფექტური კოორდინაცია. გეგმის თანახმად, ასევე, დაიწყება ინტენსიური მუშაობა ამ მიმართულებით. შეხვედრაზე ხელი მოეწერა 2019 წლის 1 აგვისტოდან 2020 წლის 31 იანვრამდე სამოქმედო და საკომუნიკაციო გეგმას.
პროექტი მიზნად ისახავს საქართველოში გეოგრაფიული აღნიშვნებისა და ადგილწარმოშობის დასახელებების სისტემის განვითარების ხელშეწყობას და ევროკავშირში არსებული გეოგრაფიული აღნიშვნების დაცვის სისტემასთან ჰარმონიზებას. ასევე, ისეთი ადმინისტრაციული და ინსტიტუციონალური მექანიზმების შექმნას, რაც ხელს შეუწყობს აღნიშნულ სფეროში კომპეტენციის გაზრდასა და ცოდნის გაღრმავებას. პროექტი, ასევე ითვალისწინებს მწარმოებელთა ასოციაციებისა და გაერთიანებების როლის გაზრდას გეოგრაფიული აღნიშვნების სისტემის განვითარებაში.
შეხვედრაში მონაწილეობდნენ ევროკავშირის წარმომადგენლები, ბენეფიციარი უწყების ხელმძღვანელები და თანამშრომლები, პროექტის ხელმძღვანელი პირები და გუნდის წევრები, საქართველოს საგარეო საქმეთა სამინისტროს, გარემოს დაცვისა და სოფლის მეურნეობის სამინისტროს, შემოსავლების სამსახურის, საქართველოში საფრანგეთისა და იტალიის საელჩოს წარმომადგენლები.
