დღეს, 17 სექტემბერს (2019წ.), ქალაქ თელავში, ისტორიული მუზეუმის ეზოში, მეცნიერებისა და ინოვაციების ფესტივალი - 2019-ის ფარგლებში სამეცნიერო პიკნიკი გაიმართა, რომელშიც ინტელექტუალური საკუთრების ეროვნულმა ცენტრმა - საქპატენტმაც მიიღო მონაწილეობა. წინა წლების მსგავსად, უწყებამ, ბავშვებისთვის ჩაატარა სახალისო გაკვეთილები ინტელექტუალური საკუთრების შესახებ. გამოგონებებისადმი ინტერესის გაღვივების მიზნით, გაიმართა სხვადასხვა თამაშები და საინტერესო აქტივობები. შემეცნებით - გასართობი საშუალებებით მოზარდებმა მიიღეს ინფორმაცია გამოგონებებისა და ინოვაციური პროდუქტის შექმნის მნიშვნელობის შესახებ ქვეყნის წინსვლისა და განვითარების საქმეში. ასევე, პიკნიკზე დარიგდა ზღაპრები ინტელექტუალური საკუთრების თემაზე.
მეცნიერებისა და ინოვაციების ფესტივალში საქპატენტთან ერთად მონაწილეობენ საქართველოს და უცხოეთის სახელმწიფო და კერძო უნივერსიტეტები, სამეცნიერო-კვლევით ცენტრები და სხვა უწყებები. სამეცნიერო პიკნიკები წელს გაიმართება ქუთაისში, ბათუმსა და ზუგდიდში.
მეცნიერებისა და სტუდენტების საერთაშორისო დღეები, მასშტაბური ინოვაციების საერთაშორისო კვირეულით, პირველად 2015 წელს ჩატარდა. 2016 წლიდან საფუძველი ჩაეყარა მნიშვნელოვან ტრადიციას, რომელიც 2019 წელსაც გრძელდება. წელს ქვეყანა კვლავ მასპინძლობს მეცნიერებისა და ინოვაციების საერთაშორისო ფესტივალს და უერთდება მსოფლიოს იმ წამყვან ქვეყნებს, რომლებიც ანალოგიური ფესტივალების გამართვით ხელს უწყობენ მკვლევართა მიღწევების ფართო საზოგადაობისთვის გაცნობას და სამეცნიერო განათლებისა და ინოვაციების პოპულარიზაციას.