დიზაინის ექსპერტიზის სახელმძღვანელო განსახილველად პატენტრწმუნებულებსა და დაინტერესებულ პირებს წარედგინათ

ევროკავშირისა და საქართველოს ინტელექტუალური საკუთრების შესახებ პროექტის (EUGIPP) ფარგლებში  შეიქმნა დიზაინის ეროვნულ და საერთაშორისო განაცხადებზე ექსპერტიზის ჩატარების სახელმძღვანელო, რომლის შედგენაზე მუშაობდნენ  დარგის ექსპერტები, ევროკავშირის ინტელექტუალური საკუთრების უწყების (EUIPO) და საქპატენტის იურისტები.   სახელმძღვანელოს შექმნა ემსახურება  საქპატენტის მიერ მიღებული გადაწყვეტილებების თანმიმდევრულობის და განაცხადებზე ექსპერტიზის ჩატარების ერთგვაროვანი პრაქტიკის ჩამოყალიბების უზრუნველყოფას.

სახელმძღვანელო განსახილველად წარედგინათ პატენტრწმუნებულებსა და სხვა დაინტერესებულ პირებს.  სამუშაო შეხვედრაზე მიღებული  შენიშვნები და წინადადებები  განხილვის შემდეგ აისახება საბოლოო დაკუმენტში, რომელიც ხელმისაწვდომი იქნება საქპატენტის ექსპერტების, ინტელექტუალური საკუთრების უფლებების მფლობელებისა და მოსარგებლეებისთვის.  EUIPO-ს დიზაინების სახელმძღვანელოსა და საქპატენტის დიზაინის განაცხადებზე ექსპერტიზის ჩატარების სახელმძღვანელოს პრეზენტაციის გარდა, სამუშაო შეხვედრის დღის წესრიგი მოიცავდა  ინტერნეტით დიზაინებზე ინფორმაციის გახსნის შეფასების კრიტერიუმების შესახებ საერთო პრაქტიკის დოკუმენტის (CP10) წარდგენას.

საქართველოში ინტელექტუალური საკუთრების უფლებების დაცვის ადმინისტრაციული ჩარჩოს გაძლიერებისა და ინტელექტუალური საკუთრების უფლებების ადმინისტრირების ხარისხის გაუმჯობესება EUGIPP-ის ერთ-ერთი კომპონენტია. პროექტი, რომლის მთავარი მიზანია საქართველოში ინტელექტუალური საკუთრების სისტემის გაძლიერება, სამწლიანია და ის 2022 წლის ბოლოს დასრულდება. ევროკავშირის მხრიდან პროექტს ახორციელებს ევროკავშირის ინტელექტუალური საკუთრების უწყება (EUIPO), მთავარი ბენეფიციარი კი - საქართველოს ინტელექტუალური საკუთრების ეროვნული ცენტრი - საქპატენტია.