26 აპრილი - ინტელექტუალური საკუთრების მსოფლიო დღეა!

2022 წლის 26 აპრილს, ინტელექტუალური საკუთრების მსოფლიო ორგანიზაციის (WIPO) გადაწყვეტილებით, WIPO-ს წევრი სახელმწიფოები,  ინტელექტუალური საკუთრების პოლიტიკის გამტარებელი უწყებები მთელს მსოფლიოში, შემდეგი სლოგანის ირგვლივ გაერთიანდებიან: „ინტელექტუალური საკუთრება და ახალგაზრდობა: ინოვაცია უკეთესი მომავლისათვის“. წელს, ინტელექტუალური საკუთრების საერთაშორისო დღისადმი მიძღვნილი კამპანიის ფარგლებში, ყურადღება გამახვილდება ინოვაციებსა და შემოქმედებაზე, რომელთა მამოძრავებელი ძალაც არის ახალგაზრდა თაობა და მათი ბრწყინვალე გონება. სწორედ ახალგაზრდების უშრეტი ენერგიის, ნოვატორული იდეების, მიზანდასახულობის, კრეატიული აზროვნების ერთობლიობამ და  მწვანე ტექნოლოგიური განვითარებისკენ მიმართულმა ხედვამ  უნდა გარდაქმნას მსოფლიო  მდგრადი და უკეთესი მომავლისკენ.

ინტელექტუალური საკუთრების საერთაშორისო დღის წლევანდელი თემა წარმოადგენს შესაძლებლობას ინოვაციურად მოაზროვნე ახალგაზრდებისთვის წვლილი შეიტანონ  როგორც მათ ირგვლივ არსებული გარემო პირობების გაუმჯობესებაში, ასევე მსოფლიოს უკეთესი და მდგრადი ტექნოლოგიური მომავლის შექმნაში.

2000 წლიდან, ინტელექტუალური საკუთრების მსოფლიო ორგანიზაციის წევრი ქვეყნების მიერ, 26 აპრილს, ყოველწლიურად აღინიშნება ინტელექტუალური საკუთრების მსოფლიო დღე. ამ თარიღთანაა დაკავშირებული, 1970 წელს, ინტელექტუალური საკუთრების საერთაშორისო ორგანიზაციის დამფუძნებელი კონვენციის ძალაში შესვლა. აღნიშნულ დღეს, ყველას ეძლევა საშუალება, გააცნობიეროს, თუ რა წვლილი შეაქვს ინტელექტუალურ საკუთრებას მუსიკის, ხელოვნებისა და ტექნოლოგიური ინოვაციების განვითარებაში, რაც ხელს უწყობს თანამედროვე მსოფლიოს ფორმირებას.