ინოვაციების ხელშეწყობის მიმართულებით საქპატენტის საქმიანობის ანგარიშს, STEM მენტორების პროექტის შემაჯამებელ კონფერენციაზე გაეცნენ

STEM მენტორების სასწავლო კურსი, რომელიც „ათასწლეულის ფონდის“ ორგანიზებით და საქპატენტის მხარდაჭერით საქართველოში ერთი წლის განმავლობაში ხორციელდებოდა, ხელშესახები შედეგით დასრულდა. პროექტის შემაჯამებელ კონფერენციაზე წარდგენილი ანგარიშის მიხედვით, საქართველოს სხვადასხვა საჯარო სკოლას ჰყავს 40-მდე გადამზადებული მასწავლებელი, რომელსაც შეუძლია მოსწავლეებს გააცნოს ახალი ტექნოლოგიები და გაუღვივოს ინტერესი საბუნებისმეტყველო და საინჟინრო დარგებისადმი, ასევე, კურსში ჩართულმა პედაგოგებმა საკუთარ სკოლებში STEM კლუბები ჩამოაყალიბეს, რომლის ფუნქცია იქნება აღნიშნულ დისციპლინებში პროექტების შექმნის უნარების განვითარების ხელშეწყობა. 

STEM მენტორების პროექტის შემაჯამებელ კონფერენციაზე, რომელიც  ქუთაისის საერთაშორისო უნივერსიტეტში 23-24 ივნისს გაიმართა, მოხსენებით წარსდგა საქართველოს ინტელექტუალური საკუთრების ეროვნული ცენტრის - საქპატენტის გამოგონებისა და ახალი ჯიშების დეპარტამენტის ხელმძღვანელი მერაბ კუცია. საქპატენტის წარმომადგენელმა მონაწილეებს გააცნო უწყების საქმიანობა ინოვაციების ხელშეწყობის მიმართულებით, ასევე, მონაწილეობა მიიღო დისკუსიაში საქართველოში STEM განათლების გამოწვევების შესახებ.

ათასწლეულის ფონდმა, საქართველოში აშშ-ის საელჩოს საგრანტო პროგრამის ფინანსური მხარდაჭერით პროექტი, „STEM მენტორების კურსი" 2021 წლის ოქტომბერში დაიწყო. პროექტის მიზანს საბუნებისმეტყველო მეცნიერებების, საინჟინრო და ტექნოლოგიურ სფეროებში სწავლების ხარისხის გაუმჯობესება და მასწავლებლებისთვის თანამედროვე სწავლების მეთოდოლოგიის გაცნობა წარმოადგენდა. პროექტში მონაწილეობისთვის 450 მსურველიდან 40 პედაგოგი შეირჩა, საქართველოს ყველა რეგიონიდან და მათ ექვს-თვის განმავლობაში შეისწავლეს საგანმანათლებლო STEM პროექტების კონსტრუირება და თანამედროვე ციფრული ტექნოლოგიების და კომპიუტერული პროგრამირების საფუძვლები. კურსის ფარგლებში, ასევე, მასწავლებლები  გაეცნენ საქართველოში ინტელექტუალური საკუთრების პრინციპებსა და უფლებებს, კერძოდ, ახალ გამოგონებაზე პატენტის მიღების წესებსა და პროცედურებს.