EUGIPP-ს მიმდინარეობის და მისი ცალკეული კომპონენტების შესაფასებლად საქპატენტს პროექტის ლიდერი ეწვია
29 ივნისი 2022 წ.
ინტელექტუალური საკუთრების სისტემის მხარდაჭერის საერთაშორისო თანამშრომლობის პროექტის „ევროკავშირისა და საქართველოს ინტელექტუალური საკუთრების შესახებ პროექტის (EUGIPP)“ მიმდინარეობის ადგილზე გასაცნობად, საქპატენტს პროექტის ლიდერი მარტინ მარიანოვი და პროექტის კოორდინატორი ანდრეა იორი ეწვივნენ. ვიზიტის მიზანია პროექტის კომპონენტების მიმდინარეობის განხილვა და პროექტის ფარგლებში, თბილისში დაგეგმილ ღონისძიებში მონაწილეობა. საქპატენტში სტუმრები გაეცნენ სასაქონლო ნიშნების, გეოგრაფიული აღნიშვნების და დიზაინის დეპარტამენტის, ასევე, იურიდიული, გამოგონებისა და ახალი ჯიშების დეპარტამენტების საქმიანობას.
29 ივნისს, საქპატენტის სათავო ოფისში გამართულ ორხმრივ შეხვედრაზე, რომელსაც საქპატენტის მხრიდან თავმჯდომარის მოვალეობის შემსრულებელი ნინო ჩიქოვანი ესწრებოდა. მარტინ მარიანოვმა ხაზი გაუსვა პროექტის წარმატებით და ნაყოფიერ მიმდინარეობას და განიხილა სამომავლო თანამშრომლობის პერსპექტივები.
„ევროკავშირისა და საქართველოს ინტელექტუალური საკუთრების შესახებ პროექტის ფარგლებში დაგეგმილი და განხორციელებული სამუშაო და შესაბამისი შედეგები ძალიან დიდ წვლილს შეიტანს ქვეყნის ინტელექტუალური საკუთრების სისტემის განვითარების მიმართულებით“ - აღნიშნა ნინო ჩიქოვანმა.
EUGIPP წარმოადგენს ევროკავშირის მიერ დაფინანსებულ საერთაშორისო თანამშრომლობის პროექტს, რომელიც 2020 წლის 1 იანვრიდან მიმდინარეობს და მას ევროკავშირის ინტელექტუალური საკუთრების უწყება (EUIPO) ახორციელებს. პროექტის ძირითადი ბენეფიციარია საქართველოს ინტელექტუალური საკუთრების ეროვნული ცენტრი - „საქპატენტი“. პროექტი სამწლიანია, მისი ბიუჯეტი შეადგენს 1,2 მილიონ ევროს.
