საერთაშორისო კონფერენციას „პერსპექტივები გეოგრაფიული აღნიშვნების შესახებ“ საქპატენტის წარმომადგენელი ესწრება

გეოგრაფიული აღნიშვნების ექსპერტები მსოფლიოს სხვადასხვა ქვეყნიდან მონპელიეში არიან შეკრებილები. 5 ივლისს, საფრანგეთში გაიხსნა საერთაშორისო კონფერენცია  „პერსპექტივები გეოგრაფიული აღნიშვნების შესახებ“, რომელიც ორგანიზებულია გაეროს სურსათისა და სოფლის მეურნეობის ორგანიზაციის (FAO) და საფრანგეთის სოფლის მეურნეობის კვლევითი ცენტრის - საერთაშორისო განვითარებისათვის (CIRAD) მიერ. შეხვედრას საქართველოს დელეგაციაც ესწრება, რომლის შემადგენლობაშია ინტელექტუალური საკუთრების ეროვნული ცენტრის - საქპატენტის იურიდიული დეპარტამენტის უფროსის მოვალეობის შემსრულებელი ირაკლი კასრაძე.

კონფერენცია „პერსპექტივები გეოგრაფიული აღნიშვნების შესახებ“ არის ინტერაქციული ხასიათის, სადაც გეოგრაფიული აღნიშვნების შესახებ უახლესი კვლევების ანალიზის საფუძველზე მოხდება ქვეყნებს შორის საუკეთესო პრაქტიკის გაზიარება. ღონისძიებაზე  მსოფლიოს სხვადასხვა ქვეყნის 150 მონაწილე ესწრება, რომელთა შორის არიან გეოგრაფიული აღნიშვნების მკვლევრები, ექსპერტები, საჯარო უწყების წარმომადგენლები, საერთაშორისო ორგანიზაციები,  მეწარმეები, არასამთავრობო ორგანიზაციები და სხვა დაინტერესებული მხარეები. 

კონფერენციის ფარგლებში მონაწილეები განიხილავენ  გეოგრაფიულ აღნიშვნებთან დაკავშირებულ აქტუალურ საკითხებს, მათ შორის, დისკუსია გაიმართება ლისაბონის  - ადგილწარმოშობის დასახელებების დაცვისა და მათი საერთაშორისო რეგისტრაციის  შესახებ შეთანხმების ჟენევის აქტის ძალაში შესვლასთან დაკავშირებით, რომლის საფუძველზე დაფუძნდა გეოგრაფიული აღნიშვნების რეგისტრაციისა და დაცვის პირველი საერთაშორისო სისტემა. აღნიშნულზე დაყრდნობით შეჯამდება ბოლო 25 წლის კვლევის შედეგები, მოხდება პრაქტიკული გამოცდილების გაზიარება, ახალი იდეებისა და პერსპექტივების წარმოჩენა. 

კონფერენცია „პერსპექტივები გეოგრაფიული აღნიშვნების შესახებ“  რომელიც 8 ივლისს დასრულდება, მოიცავს როგორც თეორიულ ასევე პრაქტიკულ ნაწილს, პლენარული და პარალელური სესიების ჩატარებას მონაცვლეობით და სხვა აქტივობებს. კონფერენციის პირველ დღეს, საქართველოს დელეგაციამ დამსწრე საზოგადოებას წარუდგინა მოხსენება  საქართველოში გეოგრაფიული აღნიშვნების პოლიტიკის შესახებ.