საქპატენტის დელეგაცია კონფერენციაში „ინტელექტუალური საკუთრების სასამართლო პრაქტიკა 2022“ მონაწილეობს

ინტელექტუალური საკუთრების სასამართლო პრაქტიკის, კანონმდებლობაში არსებული გლობალური გამოწვევებისა და განვითარების პერსპექტივების განხილვის მიზნით, 7 ივლისს, ალიკანტეში  ინტელექტუალური საკუთრების სასამართლო პრაქტიკის შესახებ რიგით  მე-4 კონფერენცია გაიხსნა. ევროკავშირის ინტელექტუალური საკუთრების უწყების (EUIPO) სააპელაციო საბჭოსა და სასწავლო აკადემიის მიერ ორგანიზებულ ღონისძიებას ესწრება საქართველოს დელეგაცია, საქპატენტის თავმჯდომარის მოადგილის ბექა დოჭვირის ხელმძღვანელობით. 

კონფერენცია ემთხვევა EUIPO-ს სააპელაციო საბჭოს 25 წლის იუბილეს, რამაც განაპირობა ღონისძიების მასშტაბურობა, მონაწილეების და განსახილველი თემებისა ფართო სპექტრის მოცვა. ესპანეთის სამეფოში მოწვეულები არიან ინტელექტუალური საკუთრების სფეროში მომუშავე სხვადასხვა ქვეყნის წამყვანი ექსპერტები, ინტელექტუალური საკუთრების უწყებების წარმომადგენლები, მოსამართლეები, კანონმდებლები, მეცნიერები და იურისტები. ორი დღის განმავლობაში, ალიკანტეში, ღონისძიებაზე შეკრებილი საზოგადოება დისკუსიას გამართავს  შემდეგი თემების ირგვლივ: ზოგადი სასამართლო პრაქტიკა; მდგრადობა და მწვანე ტექნოლოგიები ინტელექტუალურ საკუთრებაში;  უფლებები ინტელექტუალურ საკუთრებაზე და მათი კავშირი კულტურასთან, მოდასთან და გართობასთან; ჯანმრთელობა როგორც ინტელექტულუარი საკუთრების ფასეულობა; ციფრული ეპოქისთვის დამახასიათებელი თავისებურებანი და გამოწვევები;  კვებისა და მრეწველობის დარგში ინტელექტუალური საკუთრების უფლებების ზრდა. 

ევროკავშირისა და საქართველოს ინტელექტუალური საკუთრების პროექტის (EUGIPP) ფინანსური მხარდაჭერით, საქართველოდან კონფერენციაზე მონაწილეობას საქპატენტის წარმომადგენლებთან ერთად, იღებენ უზენაესი და სააპელაციო სასამართლოს მოსამართლეები. ჰიბრიდულ რეჟიმში მიმდინარე ღონისძიებაზე, ასევე, დისტანციურად, დასწრების საშუალება მიეცათ საქპატენტის 22 თანამშრომელს. აღნიშნული მხარდაჭერა განხორციელდა, საქპატენტსა და EUIPO-ს შორის ურთიერთთანამშრომლობის მემორანდუმის ფარგლებში, რომელიც ითვალისწინებს უწყებებს შორის თანამშრომლობას ინტელექტუალური საკუთრების სფეროში ინფორმაციისა და გამოცდილების გაზიარების კუთხით, საგანმანათლებლო და ცნობიერების ასამაღლებელი აქტივობებში მონაწილეობის ხელშეწყობას განსაზღვრული სამიზნე ჯგუფისთვის, რომელთა შორის არიან საქპატენტის თანამშრომლები.  

ევროკავშირის ინტელექტუალური საკუთრების უწყება (EUIPO) ადმინისტრირებას უწევს ევროკავშირის სასაქონლო ნიშნებსა და დიზაინებს და ახორციელებს ევროკავშირის სასაქონლო ნიშნებისა და დიზაინების რეგისტრაციას ერთი განაცხადის საშუალებით. მის ბაზაზე ფუნქციონირებს ინტელექტუალური საკუთრების დავების გადაწყვეტის სააპელაციო საბჭო და ინტელექტუალური საკუთრების სასწავლო ცენტრი. EUIPO უზიარებს გამოცდილებას და ეხმარება პრაქტიკის ჰარმონიზებაში ევროკავშირის წევრი სახელმწიფოების ინტელექტუალური საკუთრების უწყებებს და საერთაშორისო პარტნიორებს.