PCT ეროვნული ფაზა საქპატენტში

საერთაშორისო (PCT) განაცხადი, რომელშიც გამოგონების ან სასარგებლო მოდელის ეროვნული პატენტის მისაღებად აღნიშნულია საქართველო, ტოლფასია საქპატენტში შეტანილი განაცხადისა და საერთაშორისო განაცხადის შეტანის დღიდან განიხილება, როგორც ეროვნული განაცხადი.

საქპატენტი მოქმედებს, როგორც „აღნიშნული უწყება“ (Designated Office), იმ საერთაშორისო განაცხადის მიმართ, რომელშიც გამოგონების ან სასარგებლო მოდელის ეროვნული პატენტის მისაღებად აღნიშნულია საქართველო.

იმ საერთაშორისო განაცხადის მიმართ, რომელშიც გამოგონების ან სასარგებლო მოდელის ეროვნული პატენტის მისაღებად აღნიშნულია საქართველო, საქპატენტი მოქმედებს, როგორც „არჩეული უწყება“ (Elected Office), თუ განმცხადებელი საპატენტო კოოპერაციის ხელშეკრულების მეორე თავის პირობების თანახმად ირჩევს საქართველოს.

საერთაშორისო განაცხადი, გაივლის რა საერთაშორისო ფაზის დადგენილ პროცედურებს -  განაცხადის წარდგენას, საერთაშორისო ძიებას, საერთაშორისო გამოქვეყნებას, წინასწარ ექსპერტიზას (განმცხადებლის მოთხოვნით), განაცხადის შეტანის თარიღიდან ან პრიორიტეტის თარიღიდან 31 თვის შემდეგ შესაძლებელია ეროვნული პატენტის (გამოგონებაზე ან სასარგებლო მოდელზე) მისაღებად ეროვნული ფაზის დაწყება საქპატენტში. ამისათვის საჭიროა საქპატენტის გამოგონების ან სასარგებლო მოდელის განცხადების ბლანკის შევსება და საქპატენტში წარდგენა, ან შესაბამისი ელექტრონული განაცხადის შევსება საქპატენტის ელექტრონული განაცხადების სისტემაში.

საქპატენტში ეროვნული ფაზის დაწყებიდან 2 თვის ვადაში განმცხადებელმა უნდა წარადგინოს განაცხადის თარგმანი ქართულ ენაზე.

თუ განაცხადი წარადგინა განმცხადებლის წარმომადგენელმა, განაცხადს წარდგენისთანავე ან წარდგენის დღიდან 2 თვის ვადაში უნდა დაერთოს წარმომადგენლობის უფლებამოსილების დამადასტურებელი საბუთი.

თუ განმცხადებელი გამომგონებლის უფლებამონაცვლეა, განაცხადს წარდგენისთანავე ან წარდგენის დღიდან 2 თვის ვადაში უნდა დაერთოს უფლებამონაცვლეობის დამადასტურებელი საბუთი.

ტექნიკის დონის განსაზღვრის საფასურზე გათვალისწინებულია 50%-იანი შეღავათი, თუ წარმოდგენილი იქნება საერთაშორისო საძიებო უწყების წერილობითი დასკვნის WO/ISA (PCT ფორმა 237) და წინასწარი საერთაშორისო ექსპერტიზის დასკვნის IPER (PCT ფორმა 409), ასეთის არსებობის შემთხვევაში, თარგმანი ქართულ ენაზე.

საერთაშორისო განაცხადზე ეროვნული ფაზის საქპატენტში დაწყების შემდეგ, განაცხადი გადის იმავე პროცედურას, რასაც გამოგონების ან სასარგებლო მოდელის ეროვნული პროცედურით საქპატენტში წარდგენილი განაცხადი.

დამატებითი ინფორმაცია იხილეთ შემდეგ ბმულებზე:

ზოგადი ინფორმაცია საქართველოს, როგორც PCT წევრი ქვეყნის შესახებ

https://www.wipo.int/export/sites/www/pct/guide/en/gdvol1/annexes/annexb1/ax_b_ge.pdf

PCT ეროვნული ფაზა საქპატენტში

https://www.wipo.int/export/sites/www/pct/guide/en/gdvol2/annexes/ge.pdf