| ENGLISH |
 |
 |
საქართველოს ინტელექტუალური საკუთრების ეროვნულ ცენტრს
„საქპატენტსა“ და ევროკავშირის ინტელექტუალური
საკუთრების უწყებას (EUIPO) შორის ახალი ურთიერთთანამშრომლობის მემორანდუმი გაფორმდა.
მომავალი თაობის ინოვაციური უნარების წახალისების მიზნით, EPO-ს ყოველწლიურ კონკურსს -„ევროპელი გამომგონებლის ჯილდო“, 2022 წელს ემატება ახალი ნომინაცია - „ახალგაზრდა გამომგონებელთა პრიზი“. ეს პრიზი განკუთვნილია ახალგაზრდა ინოვატორებისთვის, რომლებიც მუშაობენ ისეთი ტექნოლოგიური ინოვაციების შექმნაზე, რომელიც ხელს უწყობს გაეროს მდგრადი განვითარების მიზნების მიღწევას.
საქართველოს ინტელექტუალური საკუთრების ეროვნული ცენტრი - საქპატენტი შეუერთდა ინტელექტუალური საკუთრების მსოფლიო ორგანიზაციის (WIPO) მიერ ადმინისტრირებად ელექტრონულ სისტემას DAS-ს (Digital Access Service), რომელიც სისტემაში ჩართულ ინტელექტუალური საკუთრების უწყებებს საშუალებას აძლევს უსაფრთხოდ, ელექტრონული სახით, გაცვალონ პარიზის კონვენციით გათვალისწინებული, პრიორიტეტთან დაკავშირებული დოკუმენტაცია.
ინტელექტუალური საკუთრების ზოგადი კურსის (DL101GE) გაზაფხულის სესიის წარჩინებულ 12 კურსდამთავრებულს დღეს სერტიფიკატები გადაეცა. საქპატენტის ინიციატივით, ინტელექტუალური საკუთრების მსოფლიო ორგანიზაცია (WIPO), 12-ვე პირს, მათი ინტერესის გათვალისწინებით, WIPO-ს აკადემიის სპეციალიზებულ კურსს დაუფინანსებს.
საქართველოს ინტელექტუალური საკუთრების ეროვნული ცენტრისთვის – „საქპატენტი“, ესტონეთის რესპუბლიკაში საქართველოს საელჩოს დახმარებით, ცნობილი გახდა, რომ ესტონეთის ტერიტორიაზე ადგილი ჰქონდა ყველის დაცული ქართული გეოგრაფიული აღნიშვნის - „სულგუნი“ უკანონოდ გამოყენების ფაქტს. შესაბამისი ღონისძიებების განხორციელების შემდგომ, სუპერმარკეტების ქსელიდან „SELVER“ ამოღებულ იქნა დასახელება „Suluguni“-ით უფლების დარღვევით ნიშანდებული პროდუქცია.
საქართველოში მცენარეთა ახალი ჯიშების დაცვისუნარიანობის კრიტერიუმების (განსხვავებულობა, ერთგვაროვნება, სტაბილურობა) გამოცდის (DUS ტესტი) ჩატარება შესაძლებელი უახლოეს მომავალში იქნება. გამოცდის ჩატარებაზე უფლებამოსილი უწყების განსაზღვრისთვის საჭირო სამართლებრივი და ტექნიკური ღონისძიებები მრგვალი მაგიდის ფორმატის შეხვედრაზე განიხილეს.
ონლაინ ფორმატში გამართულ ღონისძიებაში მონაწილეობა მიიღეს საქპატენტის, გაეროს სურსათისა და სოფლის მეურნეობის ორგანიზაციის (FAO), საქართველოს გარემოს დაცვისა და სოფლის მეურნეობის სამინისტროს, სოფლის მეურნეობის სამეცნიერო-კვლევითი ცენტრისა და თესლის მწარმოებელთა და სანერგე მეურნეობების ასოციაციის წარმომადგენლებმა.
საქართველოს ინტელექტუალური საკუთრების ეროვნული ცენტრი – საქპატენტი უსაფრთხო სამუშაო გარემოს შექმნაზე ზრუნავს. დღეის მდგომარეობით უწყების თანამშრომელთა 64%-ი ვაქცინირებულია ახალი კორონავირუსის (COVID-19) საწინააღმდეგო აცრის მინიმუმ პირველი დოზით.
თამარ თათეშვილი, სალომე თათეშვილი და საბა ზედგინიძე ინტელექტუალური საკუთრების მსოფლიო ორგანიზაციის (WIPO) მანდატით ახალგაზრდებში ინტელექტუალური საკუთრების პოპულარიზაციაზე იზრუნებენ. WIPO-ს მიერ ინტელეტუალური საკუთრების ელჩის სტატუსი სამეულს ერთი წლის ვადით მიენიჭა, რაც საშუალებას აძლევს ამ ახალგაზრდებს წვლილი შეიტანონ საქართველოს, ცენტრალური ევროპისა და ბალტიის ქვეყნების ინტელექტუალური საკუთრების განვითარებაში.
საქართველოს ინტელექტუალური საკუთრების ეროვნული ცენტრის - საქპატენტის მიერ, პროექტის კანდიდატებად შეირჩა ათასწლეულის ინოვაციის კონკურსის მესამე ადგილზე გასული გუნდი „GoGeoGo“, ახალგაზრდა სამეული, რის შემდეგაც WIPO-ს აკადემიამ აღიარა მათი ინოვაციური და სამეწარმეო ძალისხმევა და მიანიჭა მათ 2021 წლის IP ელჩობა საქართველოში. ახლა მათი მისიაა ხელი შეუწყონ ინტელექტუალური საკუთრების სფეროს განვითარებას ახალგაზრდებში, როგორც საქართველოში, ასევე ცენტრალური ევროპისა და ბალტიის ქვეყნებში. საქპატენტის ერთ-ერთი მიზანი ახალგაზრდებში საგამომგონებლო, ინოვაციური, ისევე როგორც სამეწარმეო კომპეტენციების განვითარება და ინტელექტუალური საკუთრების სფეროს პოპულარიზაციაა.
ჩინეთის სახალხო რესპუბლიკაში, ქართული ადგილწარმოშობის დასახელება “ბორჯომი“, ინტელექტუალური საკუთრების ეროვნული ცენტრის - საქპატენტის მიმართვის საფუძველზე დარეგისტრირდა.
ამიერიდან, ჩინეთის სახალხო რესპუბლიკაში, საქართველოს გარემოს დაცვისა და სოფლის მეურნეობის სამინისტროს თანხმობის გარეშე, ადგილწარმოშობის დასახელება „ბორჯომის“ გამოყენება აიკრძალება.
სვანური კოშკი, ქვევრი, ყურძნის მტევანი, ოქროს საწმისი - ქართული გეოგრაფიული აღნიშვნის და ადგილწარმოშობის დასახელების ლოგოს ელემენტებია, რომელიც გეოგრაფიული აღნიშვნითა და ადგილწარმოშობის დასახელებით დაცული პროდუქტების იდენტიფიცირებისთვის შეიქმნა. ლოგოზე იმუშავა სარეკლამო კომპანია abk communication-მა, რომლისთვისაც ინსპირაცია ხევსურეთის სოფელ კისტანის „აბულეთაურთ“ ციხე-კოშკის ჩრდილოეთ სარკმელის ქვედა ქვა გახდა.
