| ENGLISH |
 |
 |
ტექნიკური სამუშაო შეხვედრა გაიმართა ევროკავშირის ინტელექტუალური საკუთრების ქსელის (EUIPN) ფარგლებში შექმნილი ინსტრუმენტებისა და პრაქტიკის შესახებ, უკრაინაში, კიევში. ღონისძიებაზე, რომელიც ევროკავშირის ინტელექტუალური საკუთრების უწყების (EUIPO) მიერ იყო ორგანიზებული, სომხეთის, აზერბაიჯანის, საქართველოს, მოლდოვისა და უკრაინის ინტელექტუალური საკუთრების უწყებების წარმომადგენლები დაესწრნენ.
საქართველო არის ერთ-ერთი მოწინავე ქვეყანა ინტელექტუალური საკუთრების მიმართულებით, რომელმაც ინტელექტუალური საკუთრების სფეროში, არაევროკავშირის წევრ ქვეყნებს შორის, პირველმა დანერგა ევროკავშირის პრაქტიკა სამუშაო ინსტრუმენტებთან მიმართებაში. აღნიშნული განხორციელდა ევროკავშირის დაფინანსებით მიმდინარე ევროკავშირისა და საქართველოს ერთობლივი პროექტის (EUGIPP) ფარგლებში. სამუშაო შეხვედრაზე დამსწრე პირები გაეცნენ საქართველოს დელეგაციის მიერ წარმოდგენილ პრეზენტაციას, პროექტის შინაარსს და მიმდინარეობას.
საქპატენტის დელეგაციამ, უკრაინაში ოფიციალური ვიზიტის ფარგლებში, შეხვედრები გამართა უკრაინის ეკონომიკის სამინისტროს ინტელექტუალური საკუთრების დეპარტამენტისა და უკრაინის ინტელექტუალური საკუთრების ინსტიტუტის („უკრპატენტი“) წარმომადგენლებთან. კიევში, 29 ნოემბრიდან 1 დეკემბრის ჩათვლით იმყოფებოდნენ საქპატენტის თავმჯდომარის მოადგილე ნინო ჩიქოვანი და საქპატენტის სასაქონლო ნიშნების, გეოგრაფიული აღნიშვნებისა და დიზაინის დეპარტამენტის უფროსი ირაკლი კასრაძე.
შეხვედრების მთავარ მიზანს წარმოადგენდა, უწყებებს შორის არსებული გამოცდილების გაზიარება და სამომავლო ორმხრივი თანამშრომლობის გეგმების განხილვა, კერძოდ: უკრაინასა და საქართველოს შორის გეოგრაფიული აღნიშვნების, ადგილწარმოშობისა და წარმოშობის წყაროს აღნიშვნების ურთიერთაღიარებისა და დაცვის შესახებ ახალი, ყოვლისმომცველი შეთანხმების გაფორმება, რაც ორივე ქვეყნის პრიორიტეტულ მიმართულებას წარმოადგენს და დადებითად აისახება ქვეყნების ეკონომიკურ განვითარებაზე.
დღეს, ინტელექტუალური საკუთრების ეროვნული ცენტრის სათავო ოფისში, საქპატენტისა და ევროპის იურისტ სტუდენტთა ასოციაცია - ელსა თბილისის (ELSA Tbilisi) ერთობლივი სტაჟირების პროექტის ფარგლებში, საქპატენტის წარმომადგენლებმა ELSA Tbilisi-ს წარმომადგენლებსა და წევრ სტუდენტებს გახსნითი ღონისძიებით უმასპინძლეს. ELSA Tbilisi-ის წევრი სამი ახალგაზრდა, ბესიკ მაჩაბელი, ანა გვარამია და სოფიო ლეჟავა დღეიდან, 4 თვის განმავლობაში სტაჟირებას საქპატენტში გაივლიან. გახსნით ღონისძიებაზე, სტუმრებსა და სტაჟიორებს საქპატენტის სასწავლო ცენტრის თანამშრომლებმა და დეპარტამენტის უფროსებმა წარუდგინეს სტაჟირების პროექტის მიმდინარეობა, მათ მიერ შემუშავებული პროგრამა და შედეგები.
„სმარტ კოსტუმი NBSG – Nitinol Based Smart Gauntlets “ პროექტის ავტორებმა მოიპოვეს გამარჯვებულის ტიტული 2021 წლის ნორჩ გამომგონებელთა და მკვლევართა კონკურსზე „ლეონარდო და ვინჩი“. გრანპრის მფლობელები დემეტრე საზანოვი, სანდრო ლორთქიფანიძე და ლიზა სორდია ვლადიმირ კომაროვის თბილისის ფიზიკა-მათემატიკის N199 საჯარო სკოლის მოსწავლეები არიან. „სმარტ კოსტუმის“ გამომგონებელი გუნდი გახდა საქპატენტის რჩეულიც, რომელიც გამოირჩეოდა ინოვაციურობით.
2021 წ. 22-24 ნოემბერს საქპატენტის თანამშრომლები სასწავლო ვიზიტით იმყოფებოდნენ ევროკავშირის ინტელექტუალური საკუთრების უწყებაში (EUIPO), ქალაქ ალიკანტეში. ვიზიტმა საქპატენტის წარმომადგენლებს შესაძლებლობა მისცა, შეხვედროდნენ სხვადასხვა დეპარტამენტების თანამშრომლებს და გაცნობოდნენ EUIPO-ს, როგორც ინტელექტუალური საკუთრების წარმატებული უწყების საქმიანობას.
დღეს საქართველო აღნიშნავს მცენარეთა ახალი ჯიშების დაცვის საერთაშორისო კავშირის (UPOV) წევრობის 13 წლის იუბილეს.
UPOV-ი არის მცენარეთა ახალი ჯიშების დაცვის საერთაშორისო კონვენციის თანახმად შექმნილი კავშირი, რომლის საქმიანობის ძირითადი მიმართულებაა მცენარეთა ახალი ჯიშების დაცვის სფეროში სხვადასხვა ქვეყნებში მოქმედ კანონმდებლობათა მოთხოვნების ჰარმონიზება და ამ მიზნით მეთოდური და ტექნიკური დახმარების გაწევა.
ევროკავშირთან ასოცირების ხელშეკრულებით გათვალისწინებული ევროკავშირი-საქართველოს გეოგრაფიული აღნიშვნების ქვეკომიტეტის რიგით მე-5 შეხვედრა გაიმართა. ჰიბრიდულ რეჟიმში გამართულ შეხვედრას საქართველოს მხრიდან ესწრებოდნენ საქპატენტისა და სხვადასხვა სამინისტროების წარმომადგენლები.
საქპატენტის თავმჯდომარის მოვალეობის შემსრულებელმა მანანა ფრუიძემ ევროკავშირის დელეგაციის წევრებთან განიხილა საქართველოს გეოგრაფიული აღნიშვნების სტატუსთან და დაცვასთან დაკავშირებული მნიშვნელოვანი საკითხები, ასევე ექვსი ახალი ქართული გეოგრაფიული აღნიშვნის, კერძოდ, ღვინის ხუთი ქართული დასახელების - „სალხინოს ოჯალეშის“, „წარაფის“, „ახმეტას“ (ახმეტის მწვანე), „ახოების“, „ბოლნისის“ და ასევე, „ნინოწმინდის თაფლის“ ევროკავშირის ტერიტორიაზე შესაძლო დაცვის მინიჭების საკითხი, ამჟამად ევროკავშირში მიმდინარე შიდა პროცედურების სტატუსი.
2021 წ. 15 ნოემბერს საქართველოს ინტელექტუალური საკუთრების ეროვნულმა ცენტრმა - „საქპატენტმა“ ოფიციალურად გამოაქვეყნა ეროვნული და საერთაშორისო დიზაინების ექსპერტიზის სახელმძღვანელო. ევროკავშირისა და საქართველოს ინტელექტუალური საკუთრების პროექტით (EUGIPP), რომელსაც ახორციელებს ევროკავშირის ინტელექტუალური საკუთრების უწყება (EUIPO), დასრულდა მრავალწლიანი საქმიანობა ევროკავშირისა და საქართველოს ინტელექტუალური საკუთრების სისტემების ერთმანეთთან დაახლოების მიზნით. აღნიშნული სახელმძღვანელოს ქართული ვერსიის შემუშავებაზე, რომელიც პროექტის მნიშვნელოვანი ეტაპია, რამდენიმე თვის განმავლობაში იმუშავეს ინტელექტუალური საკუთრების სფეროს ექსპერტებმა EUIPO-სა და საქპატენტის იურისტებთან მჭიდრო თანამშრომლობით.
ევროკავშირისა და საქართველოს ინტელექტუალური საკუთრების შესახებ პროექტის (EUGIPP) ფარგლებში, საქპატენტის თანაორგანიზებით, შეხვედრა გაიმართა საქართველოში ინტელექტუალური საკუთრების უფლებების აღსრულებაზე პასუხისმგებელ უწყებებსა და პროექტში ჩართულ ექსპერტებს შორის, რომლებიც მუშაობენ საქართველოს ინტელექტუალური საკუთრების უფლებების აღსრულების სისტემის დასახვეწად.
ამერიკის შეერთებული შტატების სავაჭრო დეპარტამენტის კომერციული სამართლის განვითარების პროგრამის (CLDP) და ინტელექტუალური საკუთრების ეროვნული ცენტრის - საქპატენტის თანამშრომლობის ფარგლებში, შეხვედრა გაიმართა საქართველოში საავტორო უფლებების კოლექტიური მართვის თაობაზე.
