| ENGLISH |
 |
 |
ინტელექტუალური საკუთრების მსოფლიო ორგანიზაციამ (WIPO) გლობალური დაჯილდოების კონკურსი 2023 გამოაცხადა. კონკურსი მიზნად ისახავს გამოავლინოს ის კომპანიები, ფიზიკური პირები, მცირე თუ საშუალო ბიზნესში დასაქმებული გამომგონებლები, ავტორები და მეწარმეები, რომლებიც საკუთარი საქმიანი მიზნებისთვის გონივრულად იყენებენ ინტელექტუალურ საკუთრებას - ინოვაციური თუ შემოქმედებითი საქმიანობით, ზრუნავენ საყოველთაო პროგრესსა და საზოგადოების კეთილდღეობაზე.
პროექტი „კრეატიულობა და ინტელექტუალური საკუთრების სწავლება საქართველოს სკოლებში“ დასრულდა. საქართველოს ინტელექტუალური საკუთრების ეროვნული ცენტრის და ევროკავშირის ინტელექტუალური საკუთრების უწყების (EUIPO) მიერ ორგანიზებული პროექტის ფარგლებში, რომელიც მიზნად ისახავდა სასკოლო განათლებაში ინტელექტუალური საკუთრების სწავლების დანერგვას, ინტელექტუალური საკუთრების სწავლების მეთოდოლოგიაში გადამზადდა 28 სკოლის 108 მასწავლებელი. მათ განვლილ სასწავლო პერიოდში ჩაატარეს 700 გაკვეთილი ინტელექტუალური საკუთრების შესახებ. გაკვეთილებს ესწრებოდა ქვემო ქართლის, შიდა ქართლის, კახეთის, იმერეთის, რაჭა-ლეჩხუმის, ქვემო სვანეთისა და აჭარის ავტონომიური რესპუბლიკის სკოლების 2200 მოსწავლე. მასწავლებლების გადამზადების პროგრამა მოიცავდა ინტელექტუალური საკუთრების საფუძვლების შესწავლასა და პრაქტიკულ მეცადინეობებს. პროექტი ითვალისწინებდა, აგრეთვე, მასწავლებლების უზრუნველყოფას ქართულ ენაზე გამოცემული გზამკვლევით, გაკვეთილების გეგმებით, წიგნებით, ბროშურებით, სამაგიდო თამაშებითა და სხვა საჭირო ნივთებით.
საქართველოს ინტელექტუალური საკუთრების ეროვნული ცენტრის თავმჯდომარემ სოსო გიორგაძემ, აშშ-ში ვიზიტის ფარგლებში, მორიგი სამუშაო შეხვედრა ვაშინგტონში აშშ-ს ვაჭრობის დეპარტამენტის კომერციული სამართლის განვითარების პროგრამის (CLDP) მთავარ მრჩეველთან სტივ გარდნერთან 9 თებერვალს გამართა.
საქართველოს ინტელექტუალური საკუთრების ეროვნული ცენტრის თავმჯდომარე სოსო გიორგაძე აშშ-ს საპატენტო და სასაქონლო ნიშნების ოფისის (USPTO) ხელმძღვანელ ქათი ვიდალს შეხვდა, რომელიც ამავდროულად აშშ-ს ვაჭრობის მინისტრის მოადგილე და აშშ-ს პრეზიდენტის მრჩეველია ინტელექტუალური საკუთრების სფეროში. შეხვედრა USPTO-ს სათავო ოფისში, ალექსანდრიაში (აშშ, ვირჯინიის შტატი) გაიმართა.
საქართველოს ინტელექტუალური საკუთრების ეროვნული ცენტრის თავმჯდომარე სოსო გიორგაძე აშშ-ს საპატენტო და სასაქონლო ნიშნების უწყების (USPTO) მიწვევით აშშ-ში გაემგზავრა.
ვიზიტის ფარგლებში საქპატენტის ხელმძღვანელი მონაწილეობას მიიღებს ამერიკის საპატენტო უწყების მიერ ორგანიზებულ ადმინისტრაციულ პროგრამაში, რომელიც 6-10 თებერვალს ალექსანდრიაში (ვირჯინიის შტატი) გაიმართება.
ინტელექტუალური საკუთრების სფეროში კვალიფიციური კადრების მომზადების, მათი პროფესიული განვითარებისა და პრაქტიკული უნარ-ჩვევების გამომუშავების მიზნით, საქპატენტმა კონკურსი გამოაცხადა. კონკურსი ითვალისწინებს 10 კანდიდატის შერჩევას საქპატენტის გამოგონების და ახალი ჯიშების დეპარტამენტში სტაჟირების გასავლელად. სტაჟირება ანაზღაურებადი იქნება.
ჭაჭა, ჩურჩხელა, სულგუნი და ათეულობით ქართული გეოგრაფიული აღნიშვნა მოლდოვას რესპუბლიკის ტერიტორიაზე განსაკუთრებული დაცვის საგანი ხდება. საქართველოს ინტელექტუალური საკუთრების ეროვნული ცენტრის თავმჯდომარემ სოსო გიორგაძემ და მოლდოვას რესპუბლიკის ინტელექტუალური საკუთრების სახელმწიფო სააგენტოს დირექტორმა ეუგენიუ რუსუმ, დღეს, 1 თებერვალს, საქპატენტის ოფისში, ხელი მოაწერეს ორი ქვეყნის გეოგრაფიული აღნიშვნების ურთიერთაღიარებისა და დაცვის შესახებ სახელმწიფოთაშორის შეთანხმებას.
საქართველოს ინტელექტუალური საკუთრების ეროვნული ცენტრის თავმჯდომარე სოსო გიორგაძე, მოადგილეებთან, ნინო ჩიქოვანთან და მანანა ფრუიძესთან ერთად USAID საქართველოს ეკონომიკური ზრდის ოფისის დირექტორ მარიკა ოლსონს, ასევე ეკონომიკური უსაფრთხოებისა და ეკონომიკური მმართველობის პროგრამების ხელმძღვანელებს მარკ მაკკორდისა და ნატალია ბერუაშვილს შეხვდა. შეხვედრაზე იმსჯელეს საქპატენტისა და USAID-ის ურთიერთთანამშრომლობის ფარგლებში განხორციელებული და მიმდინარე პროექტების შესახებ, ასევე განიხილეს 2023 წლის გეგმები.
საქართველოს საერთო სასამართლოების მოსამართლეებთან, 29 დეკემბერს, სამუშაო შეხვედრა გამართა საქპატენტის თავმჯდომარემ სოსო გიორგაძემ. საქპატენტის სათავო ოფისში გამართულ შეხვედრას ესწრებოდნენ: სააპელაციო სასამართლოს მოსამართლეები, იუსტიციის უმაღლესი საბჭოს, იუსტიციის უმაღლესი სკოლისა და სააპელაციო სასამართლოს თავმჯდომარის ბიუროს წარმომადგენლები. შეხვედრაში მონაწილეობა მიიღო საქართველოში ევროკავშირის დელეგაციის წარმომადგენლობის პროგრამების მენეჯერმა ქეთევან ხუციშვილმა. შეხვედრაზე განიხილეს ინტელექტუალური საკუთრების კანონმდებლობაში დაგეგმილი ცვლილებების პროექტები, რომლებიც ეხება ინტელექტუალური საკუთრების უფლებების აღსრულებასთან დაკავშირებულ საკითხებს. კანონპროექტები შემუშავდა ევროკავშირისა და საქართველოს ინტელექტუალური საკუთრების შესახებ პროექტის (EUGIPP) ფარგლებში. მოსამართლეებმა საკუთარი მოსაზრებები გამოთქვეს დაგეგმილ ცვლილებებთან დაკავშირებით და შეხვედრის მონაწილეებს გააცნეს ინტელექტუალური საკუთრების შესახებ საქმეების განხილვის სტატისტიკური მონაცემები.
საქართველოს ინტელექტუალური საკუთრების ეროვნული ცენტრის „ საქპატენტი“ გადაწყვეტილებით, მიმდინარე წელს, სტუ-მ ექვს გამოგონებასა და ერთ სასარგებლო მოდელზე მოიპოვა პატენტი. სტუ-ს გამოგონებები ეხება ბუნებრივი აირის გაჟონვის მართვისა და დეტექტორის მოწყობილობის, შშმ პირთა ეტლის კიბეზე გადასაადგილებელი სატრანსპორტო საშუალებისა და სისტემის, ასევე, ვენახების სეტყვისგან დამცავი მოწყობილობის და კალაპოტქვეშა წყალმიმღები ნაგებობის მოწყობას. სტუ გახდა პატენტის მფლობელი ერთ სასარგებლო მოდელზეც, რომელიც ეხება ცემენტ-ბეტონის შემვსების და შემავსებლის მიღების ხერხს. უნივერსიტეტს, როგორც პატენტის მფლობელს, განსაკუთრებული უფლება მიენიჭა გამოგონების პატენტით დაცვის პერიოდის განმავლობაში, მისი კომერციული მიზნით დამზადების, გაყიდვის, გავრცელების, იმპორტისა და სხვა ფორმით გამოყენებისათვის. უფლების დამადასტურებელი მოწმობები საქპატენტის თავმჯდომარემ სოსო გიორგაძემ პირადად გადასცა უნივერსიტეტის რექტორს დავით გურგენიძესა და გამომგონებლებს. პატენტის მოწმობები განთავსდა სტუ-ს ინტელექტუალური საკუთრების სამართლის ლაბორატორიაში, რომელიც უკვე 1 წელია ფუნქციონირებს.
