EUGIPP-ის პროექტის აღსრულების ექსპერტის სამუშაო ვიზიტი საქართველოში
ევროკავშირისა და საქართველოს ინტელექტუალური საკუთრების შესახებ პროექტის (EUGIPP) ფარგლებში, საქართველოში სამუშაო ვიზიტით იმყოფება პროექტის ერთ-ერთი კომპონენტის „ინტელექტუალური საკუთრების უფლებების აღსრულების შედარებითი ანალიზი“ ექსპერტი კენეტ რაიტი. ვიზიტის მიზანია ინტელექტუალური საკუთრების უფლებების აღსრულების სფეროში ჩართული სახელმწიფო უწყებების სამუშაო სპეციფიკის ადგილზე გაცნობა და ქართველი კოლეგებისთვის ევროპული გამოცდილების გაზიარება. 12 ივლისს, ვიზიტის ფარგლებში, საქპატენტის სათავო ოფისში გაიმართა ორმხრივი შეხვედრა ექსპერტსა და საქპატენტის ხელმძღვანელ პირებს შორის.
საქპატენტის დელეგაცია კონფერენციაში „ინტელექტუალური საკუთრების სასამართლო პრაქტიკა 2022“ მონაწილეობს
ინტელექტუალური საკუთრების სასამართლო პრაქტიკის, კანონმდებლობაში არსებული გლობალური გამოწვევებისა და განვითარების პერსპექტივების განხილვის მიზნით, 7 ივლისს, ალიკანტეში ინტელექტუალური საკუთრების სასამართლო პრაქტიკის შესახებ რიგით მე-4 კონფერენცია გაიხსნა. ევროკავშირის ინტელექტუალური საკუთრების უწყების (EUIPO) სააპელაციო საბჭოსა და სასწავლო აკადემიის მიერ ორგანიზებულ ღონისძიებას ესწრება საქართველოს დელეგაცია, საქპატენტის თავმჯდომარის მოადგილის ბექა დოჭვირის ხელმძღვანელობით.
საერთაშორისო კონფერენციას „პერსპექტივები გეოგრაფიული აღნიშვნების შესახებ“ საქპატენტის წარმომადგენელი ესწრება
გეოგრაფიული აღნიშვნების ექსპერტები მსოფლიოს სხვადასხვა ქვეყნიდან მონპელიეში არიან შეკრებილები. 5 ივლისს, საფრანგეთში გაიხსნა საერთაშორისო კონფერენცია „პერსპექტივები გეოგრაფიული აღნიშვნების შესახებ“, რომელიც ორგანიზებულია გაეროს სურსათისა და სოფლის მეურნეობის ორგანიზაციის (FAO) და საფრანგეთის სოფლის მეურნეობის კვლევითი ცენტრის - საერთაშორისო განვითარებისათვის (CIRAD) მიერ. შეხვედრას საქართველოს დელეგაციაც ესწრება, რომლის შემადგენლობაშია ინტელექტუალური საკუთრების ეროვნული ცენტრის - საქპატენტის იურიდიული დეპარტამენტის უფროსის მოვალეობის შემსრულებელი ირაკლი კასრაძე.
შვეიცარიის კონფედერაციის ინტელექტუალური საკუთრების ფედერალური ინსტიტუტი (IPI) საქართველოს დელეგაციას მასპინძლობს
გეოგრაფიული აღნიშვნების სისტემის თავისებურებების გასაცნობად, ბერნში ქართული დელეგაცია იმყოფება IPI-ს მოწვევით, რომელიც შვეიცარიის კონფედერაციის გეოგრაფიული აღნიშვნების სისტემის მნიშვნელოვანი წევრია. დელეგაციის შემადგენლობაშია საქპატენტის იურიდიული დეპარტამენტის უფროსის მოვალეობის შემსრულებელი ირაკლი კასრაძე.
პროექტში „კრეატიულობა და ინტელექტუალური საკუთრება საქართველოს სკოლებში“ წელს 25 სკოლა ერთვება
ევროკავშირისა და საქართველოს ინტელექტუალური საკუთრების შესახებ პროექტის (EUGIPP) ერთი-ერთი კომპონენტი - „კრეატიულობა და ინტელექტუალური საკუთრება საქართველოს სკოლებში" წელს განმეორებით, უფრო დიდი მასშტაბით განხორციელდება. 4 სკოლის გარდა, 2022-2023 წელს, პროექტში საქართველოს რეგიონების კიდევ 21 სკოლა ერთვება. სასწავლო აქტივობის ფარგლებში, რომლის მიზანია კრეატიულობისა და ინტელექტუალური საკუთრების საკითხების ინტეგრირება საბაზისო განათლების სისტემაში, საქპატენტის სასწავლო ცენტრის ტრენერები გადაამზადებენ 100 მასწავლებელს. ინტელექტუალური საკუთრების სწავლების სილაბუსი ითვალისწინებს პრაქტიკულ სწავლებას, ტრენინგებზე მიღებული ცოდნის საფუძველზე სკოლებში ინტელექტუალური საკუთრების შესახებ გაკვეთილების ჩატარებას, რაც მიზნად ისახავს მოსწავლეებში კრეატიულობისა და ინოვაციურობის გაღვივებას. აღნიშნულ პროექტში ჩართული იქნება 1000 მოსწავლე.
საქპატენტი აგრძელებს მუშაობას ინტელექტუალური საკუთრების წინასწარი დიაგნოსტიკის მომსახურების დასანერგად - უწყების თანამშრომლები რიგით მეორე ტრენინგს ესწრებიან
ინტელექტუალური საკუთრების უფლებების დაცვა და კომერციალიზაცია, არამატერიალური აქტივების იდენტიფიცირების გზები არის ის მთავარი თემები, რომელიც საქპატენტის ექსპერტებისთვის გამართულ რიგით მეორე ტრენინგზე განიხილება. საქართველოსა და ევროკავშირის ინტელექტუალური საკუთრების შესახებ პროექტის (EUGIPP) ფარგლებში დღეს, 30 ივნისს, დაიწყო სასწავლო აქტივობა, რომელიც მიზნად ისახავს, საქპატენტის თანამშრომლების გადამზადებას წინასწარი დიაგნოსტიკის მომსახურების გაწევის უზრუნველსაყოფად მცირე და საშუალო მეწარმეებისთვის. ტრენინგს ინტელექტუალური საკუთრების უცხოელი ექსპერტი ელისონ ორი უძღვება.
EUGIPP-ს მიმდინარეობის და მისი ცალკეული კომპონენტების შესაფასებლად საქპატენტს პროექტის ლიდერი ეწვია
ინტელექტუალური საკუთრების სისტემის მხარდაჭერის საერთაშორისო თანამშრომლობის პროექტის „ევროკავშირისა და საქართველოს ინტელექტუალური საკუთრების შესახებ პროექტის (EUGIPP)“ მიმდინარეობის ადგილზე გასაცნობად, საქპატენტს პროექტის ლიდერი მარტინ მარიანოვი და პროექტის კოორდინატორი ანდრეა იორი ეწვივნენ. ვიზიტის მიზანია პროექტის კომპონენტების მიმდინარეობის განხილვა და პროექტის ფარგლებში, თბილისში დაგეგმილ ღონისძიებში მონაწილეობა. საქპატენტში სტუმრები გაეცნენ სასაქონლო ნიშნების, გეოგრაფიული აღნიშვნების და დიზაინის დეპარტამენტის, ასევე, იურიდიული, გამოგონებისა და ახალი ჯიშების დეპარტამენტების საქმიანობას.
ინოვაციების ხელშეწყობის მიმართულებით საქპატენტის საქმიანობის ანგარიშს, STEM მენტორების პროექტის შემაჯამებელ კონფერენციაზე გაეცნენ
STEM მენტორების სასწავლო კურსი, რომელიც „ათასწლეულის ფონდის“ ორგანიზებით და საქპატენტის მხარდაჭერით საქართველოში ერთი წლის განმავლობაში ხორციელდებოდა, ხელშესახები შედეგით დასრულდა. პროექტის შემაჯამებელ კონფერენციაზე წარდგენილი ანგარიშის მიხედვით, საქართველოს სხვადასხვა საჯარო სკოლას ჰყავს 40-მდე გადამზადებული მასწავლებელი, რომელსაც შეუძლია მოსწავლეებს გააცნოს ახალი ტექნოლოგიები და გაუღვივოს ინტერესი საბუნებისმეტყველო და საინჟინრო დარგებისადმი, ასევე, კურსში ჩართულმა პედაგოგებმა საკუთარ სკოლებში STEM კლუბები ჩამოაყალიბეს, რომლის ფუნქცია იქნება აღნიშნულ დისციპლინებში პროექტების შექმნის უნარების განვითარების ხელშეწყობა.
ათასწლეულის ინოვაციის კონკურსზე წარდგენილი პროექტი, რომელიც პატენტუნარიანობის კრიტერიუმებს დააკმაყოფილებს, საქპატენტისგან სპეციალური პრიზით დაჯილდოვდება
შიგთავსი განთავსდება მალე
საქპატენტი უწყების საქმიანობაში სახელმწიფო ენის ნორმების განმტკიცებაზე იზრუნებს
საქართველოს ინტელექტუალური საკუთრების ეროვნულ ცენტრს - „საქპატენტსა“ და სახელმწიფო ენის დეპარტამენტს შორის, ურთიერთთანამშრომლობის მემორანდუმი გაფორმდა, რომლის ფარგლებში, საქპატენტი და სახელმწიფო ენის დეპარტამენტი ერთობლივ საგანმანათლებლო, კვლევით და სხვა ტიპის პროექტებს განახორციელებენ. მემორანდუმის ხელმოწერის ცერემონია საქპატენტის სათავო ოფისში გაიმართა და დოკუმენტს ხელი საქპატენტის თავმჯდომარის მოვალეობის შემსრულებელმა ნინო ჩიქოვანმა და სახელმწიფო ენის დეპარტამენტის თავმჯდომარემ გიორგი ალიბეგაშვილმა მოაწერეს.
