| ENGLISH |
 |
 |
28 - 29 ივნისს (2017 წ.) ინტელექტუალური საკუთრების ეროვნულ ცენტრში - საქპატენტი ტარდება ePCT (Patent Cooperation Treaty- საპატენტო კოოპერაციის ხელშეკრულება) პლატფორმის გამოყენებასთან დაკავშირებული ორდღიანი ტრენინგი, რომელსაც ატარებს ინტელექტუალური საკუთრების მსოფლიო ორგანიზაციის (WIPO) წარმომადგენელი. ტრენინგის პირველ დღეს ePCT პლატფორმის შესახებ ვრცელი ინფორმაცია მიიღეს საქპატენტის გამოგონების და ახალი ჯიშების დეპარტამენტის ფორმალური ექსპერტიზის სამსახურის ექსპერტებმა, ხოლო დღეს WIPO-ს წარმომადგენელი აღნიშნულ ელექტრონულ სისტემაზე ინფორმაციას გააცნობს დაინტერესებულ პირებს, პატენტრწმუნებულებსა და განმცხადებლებს.
გაცნობებთ, რომ 2017 წლის 29 ივნისს 10:00 საათზე საქპატენტის ვაკის ოფისში (ნ. რამიშვილის ქ. N31) გაიმართება ტრეინინგი ePCT პლატფორმის გამოყენებასთან დაკავშირებით. ტრეინინგს ჩაატარებს ინტელექტუალური საკუთრების მსოფლიო ორგანიზაციის წარმომადგენელი და იგი განკუთვნილია ყველა დაინტერესებული პირისთვის, განსაკუთრებით, პატენტრწმუნებულებისთვის და განმცხადებლებისთვის.
ტრეინინგში მონაწილეობა უფასოა. მსურველებს გთხოვთ, დაგვიდასტუროთ თქვენი მონაწილეობა შემდეგ მისამართზე: ntsukhishvili@sakpatenti.org.ge
დღეს საქართველოს ინტელექტუალური საკუთრების ეროვნული ცენტრი - საქპატენტი დაარსებიდან 25 წელს აღნიშნავს. ამ თარიღთან დაკავშირებით, თბილისის მუნიციპალიტეტის საკრებულოს დარბაზში, საზეიმო მიღება იმართება. ღონისძიებაზე საქპატენტის თავმჯდომარემ, ნიკოლოზ გოგილიძემ ყველაზე მეტი ადგილობრივი დიზაინისა და სასაქონლო ნიშნის მფლობელი კომპანიები დააჯილდოვა, მათ შორის - „ემბავუდ ჯორჯია“, «ქართუ - უნივერსალი», ,,ავერსი ფარმა“, ,,საქართველოს ბანკი“, ,,ბარამბო“ და სხვა კომპანიები. დიპლომი და ჯილდოები გადაეცათ ყველაზე მეტი პატენტის მფლობელ გამომგონებლებსა და ინტელექტუალური საკუთრების ობიექტების განაცხადების წარდგენაში ლიდერ პატენტრწმუნებულებს.
დღეს, 14 ივნისს (2017წ.), საქართველოს ინტელექტუალური საკუთრების ეროვნული ცენტრი - საქპატენტი დაარსებიდან 25 წელს აღნიშნავს. ამ თარიღთან დაკავშირებით სასტუმრო ბილტმორის დარბაზში იმართება საერთაშორისო კონფერენცია სახელწოდებით: „ინტელექტუალური საკუთრების გამოყენება ეკონომიკური განვითარებისთვის“ . კონფერენცია, რომელიც ინტელექტუალური საკუთრების მსოფლიო ორგანიზაციის (WIPO) მხარდაჭერით ტარდება, გახსნა WIPO-ს გენერალური დირექტორის მოადგილემ ჯონ სენდეიჯმა, საქართველოს სოფლის მეურნეობის მინისტრმა ლევან დავითაშვილმა და საქპატენტის თავმჯდომარემ ნიკოლოზ გოგილიძემ. კონფერენციაზე მსჯელობენ ინოვაციებისა და ინტელექტუალური საკუთრების მზარდ როლზე თანამედროვე ცოდნაზე დაფუძნებულ ეკონომიკაში და ინოვაციის ხელშეწყობის აუცილებლობაზე ქვეყნის ეკონომიკური პოტენციალის გაძლიერებისათვის. კონფერენციაში მონაწილეობენ საქართველოს მთავრობის წევრები, WIPO-ს, ევროპის საპატენტო უწყების, სხვადასხვა ქვეყნის ინტელექტუალური საკუთრების უწყებებისა და სამრეწველო სექტორის წარმომადგენლები. კონფერენციის მუშაობა ორი დღე გაგრძელდება.
დღეს, 13 ივნისს, საქართველოს ორდღიანი საქმიანი ვიზიტით ეწვია ისმო-ს (WIPO) გენერალური დირექტორის მოადგილე ჯონ სენდეიჯი, რომელიც ვიზიტის ფარგლებში დაესწრება და გახსნის ინტელექტუალური საკუთრების ეროვნული ცენტრის „საქპატენტი“ დაარსებიდან 25 წლისთავისადმი მიძღვნილ საერთაშორისო კონფერენციას, - „ინტელექტუალური საკუთრების გამოყენება ეკონომიკური განვითარებისთვის“ (14-15 ივნისი).
მიმდინარე წლის 11 ივნისს საქპატენტმა მონაწილეობა მიიღო პროექტში - „ინოვაციების ბანაკი“, რომლის მიზანი იყო 15-დან 18 წლამდე ასაკის სკოლის მოსწავლეების ინოვაციური აზროვნების განვითარება და სამეწარმეო საკითხებში ცნობიერების ამაღლება.
2017 წლის 11 და 15 ივნისს საქპატენტმა მონაწილეობა მიიღო კრეატიული სტარტაპების საქართველოს მეორე ჩემპიონატში Creative Business Cup Georgia (CBC) 2017. ჟიურის შემადგენლობაში მონაწილეობდა საქპატენტის გამოგონებების და ახალი ჯიშების დეპარტამენტის უფროსი მერაბ კუცია. პროექტების წინასწარი შეფასების მიზნით, საქპატენტმა ჩაატარა ასევე წინასწარი საპატენტო ძიება.
8 ივნისს, თბილისის სააპელაციო სასამართლოში, ოთხი მერვედფინალური იმიტირებული პროცესი გაიმართა. სასამართლო პროცესებში მონაწილეობდნენ საქართველოს სხვადასხვა უნივერსიტეტის იურიდიული ფაკულტეტის საუკეთესო სტუდენტები, რომლებმაც 2-4 ივნისს, ბორჯომში, ინტელექტუალური საკუთრების სამართლის სკოლის ტრენინგი გაიარეს.
2017 წლის 2-4 ივნისს, ქ. ბორჯომში, საქპატენტისა და ევროპის იურისტ სტუდენტთა ასოციაციის თანაორგანიზებითა და ამერიკის შეერთებული შტატების სავაჭრო დეპარტამენტის კომერციული სამართლის განვითარების პროგრამის (CLDP) დაფინანსებით, გაიმართა ინტელექტუალური საკუთრების სამართლის სკოლა, რომლის ფარგლებში საქართველოს სხვადასხვა უნივერსიტეტის იურიდიული ფაკულტეტის საუკეთესო შედეგების მქონე სტუდენტებს საქპატენტის წარმომადგენლებმა გააცნეს ინტელექტუალური საკუთრების ობიექტები, ამ ობიექტების დაცვის სამართლებრივი ასპექტები და ინტელექტუალური საკუთრების სფეროში უფლებების აღსრულების მექანიზმები.
