| ENGLISH |
 |
 |
ინტელექტუალური საკუთრების მსოფლიო ორგანიზაციის (WIPO) წევრი სახელმწიფოების 61-ე გენერალური ასამბლეა წელს ჰიბრიდულ რეჟიმში მიმდინარეობს. საქართველოს დელეგაცია, რომელსაც ინტელექტუალური საკუთრების ეროვნული ცენტრის - საქპატენტის თავმჯდომარე მინდია დავითაძე ხელმძღვანელობს, ღონისძიებაში დისტანციურ რეჟიმში მონაწილეობს. WIPO-ს ახლად არჩეულ გენერალურ დირექტორს დარენ ტანგს, მოქმედ გენერალურ დირექტორს ფრენსის გარის და WIPO-ს წევრი 193 ქვეყნის დელეგაციას, მინდია დავითაძემ სიტყვით მიმართა.
საერთაშორისო სასწავლო კურსი „გეოგრაფიული აღნიშვნების შესახებ“ წელს დისტანციურ რეჟიმში იმართება. კურსს, რომელიც ინტელექტუალური საკუთრების მსოფლიო ორგანიზაციის (WIPO) პროფესიული განვითარების პროგრამის (PDP) ნაწილია, მეოთხე წელია საქპატენტი უწევს ადმინისტრირებას.
ინტელექტუალური საკუთრების უფლებებით დაინტერესებულ ნებისმიერ პირს ეძლევა შესაძლებლობა გაიაროს „ინტელექტუალური საკუთრების ზოგადი კურსი (DL101GE)“.
საქპატენტის მიერ გამოქვეყნებული პრაქტიკის დოკუმენტებს დღეს პატენტრწმუნებულები, ინტელექტუალური საკუთრების დარგში მოქმედი იურისტები და საქპატენტის თანამშრომლები ეცნობიან. სემინარი, რომელიც ინტელექტუალური საკუთრების შესახებ ევროკავშირისა და საქართველოს ერთობლივი პროექტის (EUGIPP) ფარგლებში მიმდინარეობს, მიზნად ისახავს განმცხადებლების, ექსპერტებისა და ნებისმიერი სხვა დაინტერესებული პირებისთვის გამჭვირვალობის, იურიდიული სიცხადისა და პროგნოზირების გაზრდას სასაქონლო ნიშნებისა და დიზაინის განაცხადების ექსპერტიზასთან მიმართებაში. ღონისძიება გახსნეს საქართველოს ინტელექტუალური საკუთრების ეროვნული ცენტრის - საქპატენტის თავმჯდომარემ მინდია დავითაძემ და საქართველოში ევროკავშირის წარმომადგენლობის თანამშრომლობის განყოფილების უფროსის მოადგილემ კატალინ გერმანმა.
ინტელექტუალური საკუთრების მსოფლიო ორგანიზაციიისა (WIPO) და საქპატენტის თანამშრომლობით ქართულ ენაზე შემუშავდა „ინტელექტუალური საკუთრების ზოგადი კურსი (DL101GE)“, რომელსაც დღეს უკვე 500-მდე კურსდამთავრებული ჰყავს. საგაზაფხულო სესიის წარჩინებულ სტუდენტებს საქპატენტის თავმჯდომარემ უმასპინძლა და საზეიმოდ გადასცა WIPO-ს აკადემიის სერტიფიკატები. მინდია დავითაძემ სტუდენტებს გააცნო უწყების გადაწყვეტილება მათთვის WIPO-ს აკადემიის მაღალი საფეხურის სწავლების კურსის (DL 302) დაფინანსების შესახებ.
საქართველოში ინტელექტუალური საკუთრების სფეროს განვითარების, ბიზნეს სექტორის ჩართულობის გაზრდის და საქართველოს ინტელექტუალური საკუთრების ობიექტების პოპულარიზაციის ხელშეწყობის მიზნით, საქპატენტი და საქართველოს კულტურის პალატა ერთობლივი პროექტების განხორციელებას იწყებენ.
ღვინის “მაღრაანის ქისის”, როგორც ახალი ქართული ადგილწარმოშობის დასახელებად რეგისტრაციის შესაძლებლობაზე იმსჯელეს ახმეტის მუნიციპალიტეტის სოფელ მაღრაანში გამართულ შეხვედრაზე, რომელსაც საკანონმდებლო და აღმასრულებელი ხელისუფლების წარმომადგენლებთან ერთად ესწრებოდნენ აღნიშნული ღვინის მწარმოებლები, მევენახეები.
გუშინ, ერთ-ერთ ტელეკომპანიაში გასულ სიუჟეტთან დაკავშირებით, გვსურს, საზოგადოებას ვაცნობოთ, რომ სსიპ - საქართველოს ინტელექტუალური საკუთრების ეროვნული ცენტრის (საქპატენტის) საქმიანობის ერთ-ერთი უმთავრესი პრინციპია პოლიტიკური ნეიტრალიტეტი.
მიმდინარე წლის აპრილი-მაისის თვეში საქპატენტის ხელმძღვანელობისთვის ცნობილი გახდა, რომ სასაქონლო ნიშნების, გეოგრაფიული აღნიშვნების და დიზაინის დეპარტამენტის უფროსს - ირაკლი კასრაძეს წარმოებაში ჰქონდა სიუჟეტში მითითებული სასაქონლო ნიშნების რეგისტრაციის შესახებ განცხადებები, რომელთა რეგისტრაციის ირგვლივ დეპარტამენტის უფროსის ქმედებები აჩენდა აღნიშნული სასაქონლო ნიშნების რეგისტრაციის პროცესის პოლიტიკური მიზნებით შესაძლო გამოყენების შესახებ კითხვებს.
შესაბამისად, ორგანიზაციის რეპუტაციის შელახვის და დისკრედიტაციის თავიდან ასაცილებლად, საქპატენტის ხელმძღვანელობის გადაწყვეტილებით, ირაკლი კასრაძეს ჩამოერთვა მასზე დელეგირებული უფლებამოსილება და მისი მონაწილეობის გარეშე, კანონის მოთხოვნათა სრული დაცვით და კანონით გათვალისწინებულ ვადებში, დარეგისტრირდა ერთ-ერთი ტელევიზიის სასაქონლო ნიშანი, რის შესახებაც შეტყობინება დაუყოვნებლივ გაეგზავნა განცხადების ინიციატორ ტელევიზიას. ხოლო სიუჟეტში ნახსენები მეორე სასაქონლო ნიშანი ჯერ კიდევ მიმდინარე წლის მაისშია რეგისტრირებული.
საზოგადოებას გვსურს კიდევ ერთხელ განვუმარტოთ, რომ სსიპ - საქართველოს ინტელექტუალური საკუთრების ეროვნული ცენტრისთვის მნიშვნელოვანია როგორც ქვეყნის შიგნით, ისე მის ფარგლებს გარეთ საერთაშორისოდ მოპოვებული ავტორიტეტი და მაღალი რეპუტაცია. შესაბამისად, საქპატენტი არც მომავალში დაუშვებს თანამდებობრივი უფლებამოსილების პოლიტიკური მიზნებით გამოყენების მცდელობებს და მიიღებს ზომებს უფლებამოსილების ბოროტად გამოყენების აღსაკვეთად.
ინტელექტუალური საკუთრების ეროვნულმა ცენტრმა - საქპატენტმა დამცავი დოკუმენტი გასცა სასარგებლო მოდელზე, რომლის ტექნიკური შედეგია სერფინგის დაფის უსაფრთხოებისა და მოხერხებულობის ერთდროული ამაღლება, როგორც წყლის ზედაპირზე სასრიალოდ, ასევე ტრანსპორტირების და შენახვის დროს.
ინტელექტუალური საკუთრების ეროვნული ცენტრის - საქპატენტის სასწავლო ცენტრს ახალი ხელმძღვანელი ყავს - ანა დალაქიშვილი, ინტელექტუალური საკუთრების სამართლის მაგისტრის ხარისხს ფლობს. მისი დარგში 8 წლიანი მუშაობის სტაჟი, ინტელექტუალური საკუთრების მსოფლიო ორგანიზაციაში (WIPO) მუშაობის გამოცდილებასაც მოიცავს. ახალი ხელმძღვანელი ყავს სასწავლო ცენტრის პროგრამების მართვის გუნდს - ლალი ამირანაშვილი, ტრენინგების სამსახურს 6 წელი ხელმძღვანელობდა. საქპატენტის ახალი თავმჯდომარის მხრიდან ინტელექტუალური საკუთრების სასწავლო ცენტრის გაძლიერება და დატვირთვა, მისი ეფექტიანი ფუნქციონირება უწყების ერთ-ერთ მთავარ პრიორიტეტად დასახელდა. მისი გადაწყვეტილებით, უწყებაში გამოცხადდა შიდა კონკურსი, რომლის საფუძველზე ანას მიეცა საშუალება ცენტრის ხელმძღვანელის პოზიცია დაეკავებინა და გუნდში პროფესიონალები მოეწვია. პირველი დავალება ცენტრის ახალი კონცეფციის შექმნა იყო.
